АҚШ Халқаро жиноий судга қарши санкциялар тайёрламоқда

АҚШ Конгрессининг Вакиллар палатаси (қуйи палатаси) Халқаро жиноят судга (ХЖС) АҚШ ва унинг иттифоқчиларига нисбатан тергов ўтказганлиги учун санкциялар киритиш тўғрисидаги қонун лойиҳасини қабул қилди.

Конгрессменларнинг 247 нафари ушбу қонун лойиҳасини маъқуллаган, 155 нафари эса қарши чиққан. Гарчи лойиҳа республикачилар фракцияси томонидан киритилган бўлсада, 42 нафар демократлар партиясининг депутати ҳам бу лойиҳани қўллаб овоз берган.

Амалга татбиқ этиш кўзда тутилган санкциялар орасида ХЖС ходимларига АҚШга кириш визаси беришни рад этиш, уларнинг АҚШдаги активларини музлатиш ҳамда Америка фуқаролари ва компанияларига санкция рўйхатидаги шахслар билан бизнес юритишни тақиқлаш каби чекловлар мавжуд.

Энди қонун лойиҳаси тасдиқлаш учун Сенатга - Конгресснинг юқори палатасига юборилади. Оқ уй юқорида тилга олинган ҳужжатни қўллаб-қувватламаслигини аллақачон маълум қилган.

Эслатиш жоиз, 20 май куни ХЖС прокурори Хон Исроил Бош вазири Нетаняҳу, Мудофаа вазири Галант, шунингдек, ҲАМАСнинг уч нафар етакчисини уруш жиноятлари ва инсониятга қарши жиноятлар содир этганликда айблаб, ҳибсга олиш учун ордер беришни сўраган эди.

Бунга жавобан, Яҳудий давлатининг Ташқи ишлар вазирлиги Исроил бош вазири ва мудофаа вазирини ҳибсга олиш учун ордер берилишининг олдини олиш мақсадида штабини тузган. Нетаняҳу эса Ғарбдаги барча давлат раҳбарлари билан гаплашиб, бунга йўл қўймаслик ва ХЖСга босим ўтказишни илтимос қилган. Исроил раҳбарлари, шунингдек, "ХЖС прокурорлари бизнинг сафарларимизни чеклашга уринмасин, аввал ўзи қандай сафар қилишини ўйлаб қўйсин" дея очиқ таҳдид қилган эди.

АҚШ ҳам ХЖСга босим ўтказа бошлаган, ушбу халқаро ташкилот вакилларига таъсир қилиш дастакларидан фойдаланишни ваъда берган.

Таъкидлаш керак, ХЖС ўтган йили Россия президенти Владимир Путинни ҳибсга олиш учун ордер берганида олқишлаган АҚШ, Исроилга келганда ХЖСнинг холис ва оқилона қарор қабул қилишига шубҳа билдира бошлади.