Вьетнамда армия генерали президент этиб сайланди

Вьетнам Социалистик Республикаси Миллий ассамблеясининг еттинчи сессиясида мамлакат президенти лавозимига янги шахс тасдиқланди. Бу лавозимга Коммунистик партия Марказий Қўмитаси Сиёсий бюроси аъзоси, жамоат хавфсизлиги вазири бўлган армия генерали То Лам сайланди.

Уни сайлаш тўғрисидаги қарорни мамлакатнинг олий ҳокимият органи бўлган Миллий ассамблея депутатларининг мутлақ кўпчилиги қўллаб-қувватлади.

1957 йилда туғилган То Лам давлат хавфсизлиги соҳасида катта тажрибага эга ва бу соҳада турли раҳбарлик лавозимларида ишлаган. У, шунингдек, 1981 йилдан буён Вьетнам Коммунистик партиясининг аъзоси бўлиб, давлатнинг сиёсий ҳаётида фаол иштирок этган.

Партия Марказий Қўмитасининг пленумида ҳукмрон партия томонидан тавсия этилганидан сўнг, у илгари истеъфога чиққан аввалги раҳбар ўрнига президент лавозимига сайланди.

Вьетнам конституциясига кўра, президент Миллий ассамблея аъзолари томонидан яширин овоз бериш йўли билан сайланади.