Тошкентда "Сўнгги қўнғироқ" тадбирлари қай тартибда ўтиши аниқ бўлди
25 май куни Тошкентда истироҳат боғлари соат 21:00гача, жамоат транспорти эса 23:00гача фаолият юритади.
Тошкент шаҳар ҳокими Шавкат Умрзоқов пойтахт мактабларида "Сўнгги қўнғироқ" тадбирларини ўтказиш бўйича фармойишни имзолади.
Айтилишича, тадбирлар 25 май куни соат 9:00 дан 10:00 гача 1-4 ва 9-11 синф ўқувчилари иштирокида ўтказилади. Тадбирларда бирламчи тиббиёт воситалари бўлиши ва бегона шахсларнинг мактаб ҳудудига кирмаслиги чоралари кўрилади. Ўқитувчиларга қимматбаҳо совғалар олиш, кафе ва ресторанларда тадбирлар ташкил этишни олдини олиш чоралари кўрилади.
Миллий гвардия ва ИИББ хавфсизлик чора-тадбирларини кўради, "Сўнгги қўнғироқ"да маҳалла раиси, ёшлар етакчиси, ҳоким ёрдамчиси каби мутасаддилар ҳам иштирок этади. 25 май куни Тошкентда истироҳат боғлари соат 21:00гача, жамоат транспорти эса 23:00гача фаолият юритади. Шу муносабат билан пойтахтдаги аттракционлар ҳолати масъуллар томонидан ўрганиб чиқилади.
Ҳар бир мактабга ҳокимлик мутасаддилари бириктирилган ва фармойиш иловасида жадвалга кўра тақсимот амалга оширилган.
Эслатиб ўтамиз, аввал Мактабгача ва мактаб таълими вазирилиги ҳам "Сўнгги қўнғироқ" бўйича тавсиялар билан чиққанди. Унда айтилишича, битирувчилар иштирокида "Битирув кечалари" ўтказиш тақиқланади.
