Путин мудофаа вазирини ишдан олишга қарор қилди
Сергей Шойгу 2012 йилдан буён бу лавозимда ишлаётган эди. Унинг ўрнини Андрей Белоусов эгалламоқда.
Россия президенти Владимир Путин мудофаа вазири Сергей Шойгуни лавозимдан олишга қарор қилди.
Шойгунинг ўрнига у Федерация Кенгашига ҳукумат раҳбарининг биринчи ўринбосари Андрей Белоусов номзодини тақдим этди ва Путин фармони билан Сергей Шойгу Хавфсизлик кенгаши котиби этиб тайинланди.
Кремль матбуот хизмати хабарига кўра, Путин "Россия Федерацияси Хавфсизлик кенгаши котиби тўғрисида"ги фармонни имзолаган, унга кўра Шойгу Россия Федерацияси Хавфсизлик кенгаши котиби этиб тайинланган.
Фармон имзоланган кундан бошлаб кучга киради.
Эслатиб ўтамиз, Шойгу 2012 йилдан буён Россия мудофаа вазири лавозимида ишлаб келаётганди. Белоусов эса аввал бош вазир ўринбосари, Россия президенти ёрдамчиси каби лавозимларда ишлаган.
Яна бир фармон "Патрушев Н.П. тўғрисида" дея номланади. Путин Николай Патрушевни "бошқа ишга ўтгани муносабати билан" Россия Федерацияси Хавфсизлик кенгаши котиби лавозимидан озод қилди.
