Бўзатов фестивали: опера йўналишида беллашувлар ўтказилди

Президент ташаббуси билан ўтказиб келинаётган “Ёшлар овози — Бўзатов FEST танловининг Республика босқичи юқори кайфиятда бошланди. Катта фестивалга айланган танловнинг бу йилги якуний босқичига ҳам Қорақалпоғистон Республикаси Нукус шаҳри мезбонлик қилмоқда. 

 Ёшларнинг анъанавий танловига айланиб улгурган Бўзатов FEST чин маънода иқтидорларни кашф этиш учун хизмат қилмоқда. Буни танловнинг опера йўналиши бўйича 16-22 ёш тоифасида иштирок этаётган Дурдона Юлдашова ҳам тасдиқлайди. 

 “Мен Самарқанд вилояти Пахтачи туманидан келдим. Бу танловда иккинчи марта иштирок этишим. Ўтган йили вилоятда иккинчи ўрин билан қайтгандим. Бу йил республикагача етиб келиш насиб этди. Бўзатов мен учун янги имкониятлар эшигини очмоқда. 

 Иштирокчининг фикрича, опера йўналишида энг муҳим нарса бу — овоз. У гўё чолғу асбобига ўхшаб, бузилса яна қайта ишлаши қийин. Шунинг учун ҳам бу йўналишдагилар иложи борича шамолламасдан соғлигига эътибор қаратишлари керак.

Бироз аввал, ҳакамлар ҳайъати вакилларидан бири Ботир Матёқубов ҳам иштирокчиларни баҳолашда достон билиши ёки қўшимча тарзда чолғуларни чала олишига эмас,  айнан овозга эътибор қаратишаётганлигини айтган эди.

Бугун танловнинг иккинчи кунида айнан опера йўналиши бўйича иштирокчилар ўзаро беллашишди. Танловнинг бу йўналиши бўйича супер-финал босқичига ўтганлар рўйхати эса танлов тугаши биланоқ эълон қилинди.

 Супер-финал иштирокчисига айланган ёшлар ичида саҳнага чиқиб, ижросини маромига етказиб куйлаб бўлгандан кейин ҳам ҳаяжонини боса олмаган Дилрабо Абдулҳамидова ҳам бор. У танловга 10-15 ёш тоифаси бўйича Наманган вилоятидан келган. 7 йил давомида фортепиано билан шуғулланган Дилрабо опера йўналишига кириб келганига эндигина 1 йил бўлган. У мана шу қисқа вақт давомида жуда кўп танловларда қатнашиб, фахрли ўринларни эгаллаб келган. Бўзатов FESTда эса бу йил биринчи бор иштирок этмоқда.

Танлов давом этмоқда, ҳали олдинда 2 та: мақом ва эстрада йўналишлари бўйича супер-финал иштирокчиларини ва 4 йўналиш бўйича мутлақ ғолибларни аниқлаш бор.

 Одинахон Деҳқонова