Бухоро ҳокими байрам учун ярим миллиард сўмдан ошиқ пул ажратди
Тошкентда бўлиб ўтган "Наврўз" байрамида қатнашган вилоят ижодий гуруҳининг харажатлари ва вилоятдаги байрам учун 533,7 миллион сўм берилади.
Бухоро вилояти ҳокими Ботир Зариповнинг пул ажратиш тўғрисида фармойиши эълон қилинди.
Фармойишга кўра, вилоят маҳаллий бюджетининг қўшимча маблағлари ҳисобидан Тошкент шаҳрида бўлиб ўтган "Наврўз" байрамида қатнашган вилоят ижодий гуруҳининг харажатлари ва вилоятдаги байрам учун 533,7 миллион сўм вилоят маданият бошқармасига ажратилади.
Маданият бошқармаси пулларни мақсадли ишлатиш ва иқтисод қилинганини бюджетга қайтариш чораларини кўради. Мазкур фармойиш ижросини назорат қилиш ҳокимнинг туризм, маданият, маданий мерос ва оммавий коммуникациялар бўйича ўринбосари Б.Шахриёров зиммасига юкланган.
Аввалроқ Навоий вилояти ҳокими Нормат Турсунов таълим, ободонлаштириш ва бошқа мақсадлар учун 2,5 млрд. сўм ажратганди.
