Тожикистонликлар Россияга киришда қийинчиликларга учрамоқда
Мамлакат ташқи ишлар вазирлиги мазкур масала юзасидан Россия элчиси билан учрашган.
Тожикистон фуқаролари Россияга киришда оммавий муаммоларга дуч келмоқда.
Тожикистон Ташқи ишлар вазирлиги Россиянинг мамлакатдаги элчиси Семён Григоревни Россия чегарасини кесиб ўтиш билан боғлиқ муаммоларни муҳокама қилиш учун таклиф қилган. Ташқи ишлар вазирлиги раҳбари ўринбосари Содиқ Имомий мамлакат фуқаролари Россия чегарасини кесиб ўтишга уринаётганда дуч келадиган муаммолардан хавотир билдирди.
"Тожикистон томони сўнгги бир неча ҳафта ичида Тожикистон фуқаролари Россия Федерацияси давлат чегарасини кесиб ўтишда дуч келган муаммолардан хавотир билдирди. Имомий буни Россия элчиси Григоревга етказди", — дейилади Тожикистон ТИВ сайтининг рус тилидаги версиясида.
Томонлар икки давлат ўртасидаги ҳамкорликни янада мустаҳкамлаш ва кенгайтириш масалаларини ҳам муҳокама қилдилар.
Бир кун аввал Asia Plus нашри уларга уч тожик муҳожири юборган видео ва аудиога таяниб, 22 апрелдан буён Оренбург вилоятидаги Қозоғистон-Россия чегарасида 180 га яқин тожикистонлик давлат рақамларига эга автомобиллар қолиб кетганини хабар қилган эди. Нашрнинг ёзишича, чегарада қолиб кетганлар орасида аёллар ва болалар ҳам кўп.
Нашрнинг ёзишича, Тожикистон фуқароларига Россияга кириш фақат телефон орқали тинтув ва сўроқдан сўнг берилган. Воқеа гувоҳларининг нашрга маълум қилишича, ҳар томонлама сўроқдан кейин Тожикистон фуқаролари бўлган бор-йўғи 10-12 машина Россияга 24 соат ичида, 20 та машина эса икки кун ичида киритилди.
