Сирдарё ҳокими юзага келган қарздорлик учун 3,8 млрд. сўм ажратди
Маблағ вилоят бюджетининг эркин қолдиқлари ҳисобидан тақдим этилади.
Сирдарёда "Тадбиркорлар ва ҳунармандлар маркази" қурилишида юзага келган қарздорликларни қоплаш учун 3,8 млрд. сўм ажратилади.
Бу ҳақда ҳоким Акмалжон Маҳмудалиевнинг тегишли фармойиши қабул қилинди. Маблағ вилоят бюджети эркин қолдиқ пуллари ҳисобидан "Ягона буюртмачи" ДУКка ажратилади.
Ажратилган маблағ доирасида амалга оширилган ишлар тўғрисидаги маълумотлар вилоят ҳокимлиги веб-сайтига жойлаштирилади.
Ғазначилик хизмати бошқармаси ва Давлат молиявий назорат бошқармаси маблағларнинг ишлатилиши жараёнини назоратга олади ва якуний текширув ўтказади.
Эслатиб ўтамиз, куни кеча Тошкент шаҳар ҳокими Шавкат Умрзоқов ҳокимлик биноси ва зарур харажатлар учун 7 млрд. сўмдан ошиқ маблағ ажратганди.
