ҲАМАС ҳарбий қанотининг муҳим етакчиси Марван Исса ўлдирилди
Ҳарбий гуруҳнинг ўзи бу маълумот юзасидан изоҳ бермади.
Оқ уйнинг миллий хавфсизлик бўйича маслаҳатчиси Жейк Салливаннинг маълум қилишича, ўтган ҳафта Исроил ҳарбийлари ҲАМАС гуруҳининг жангари қаноти етакчиларидан бири Марван Иссани ўлдирди.
Исроил аввалроқ Исса Ғазо секторидаги зарба нишони бўлганини даъво қилган, бироқ унинг ўлимини тасдиқламаганди.
"ҲАМАС раҳбарлигидаги учинчи одам Марван Исса ўтган ҳафта Исроил амалиётида ўлдирилган. Қолган етакчи раҳбарлар, эҳтимол, туннеллар тармоғида яширинган", — деди Салливан брифинг чоғида.
Ҳарбий гуруҳ расмийлари Иссанинг ўлими ҳақидаги хабарларга изоҳ бермади.
11 март куни Исроил ҳарбийлари Ғазо марказидаги Нусайрат қочқинлар лагери яқинидаги ер ости мажмуасига ҳаво ҳужуми уюштиргани, Исса нишонга олинганини маълум қилди ва уни 7 октябрь куни Хамаснинг Исроилга ҳужуми ташкилотчиларидан бири деб атади.
Исса ҲАМАСнинг ҳарбийлаштирилган қаноти" Ал-Қассам" бригадаларини бошқарадиган Муҳаммад Деифнинг ўринбосари эди.
Исроил қуролли кучлари матбуот котиби Даниел Ҳагарининг айтишича, Исса операцияда ўлдирилганми ёки йўқми, ҳозирча аниқ эмас: "Биз зарба оқибатларини ўрганяпмиз ва якуний тасдиқ ҳали олинмаган".
