Тошкент йўллари пиёдаларга мослаштирилади
Президент Тошкентдаги гавжум чорраҳалар ва кўчаларни тартибга солиш, тирбандликни тартибга солиш бўйича тақдимот билан танишди.
Тошкент йўлларини пиёдаларга мослаш чоралари кўрилади. Автотранспорт воситларини рўйхатга олиш ва диагностика марказига ташриф чоғида Президент Шавкат Мирзиёевга Тошкент шаҳридаги гавжум чорраҳалар ва кўчаларни тартибга солиш, бу орқали тирбандликларни бартараф этишга оид лойиҳа тақдимот қилинди.
Лойиҳа ўз олдига учта асосий вазифа қўйган - пиёдалар хавфсизлиги ва қулайлиги, жамоат транспортига устуворлик, ўтказиш қобилиятини ошириш ва йўл транспорт ҳодисалари сонини камайтириш.
Мазкур лойиҳа синов тариқасида Тошкент шаҳридаги йирик чорраҳада — Бобур ва Фурқат кўчалари кесишмасида амалга оширилди.
Пиёдалар учун чорраҳада “хавфсизлик оролчалари” бунёд этилди, пиёдалар ўтиш жойида светофорни бошқариш ускуналари ўрнатилди. Жамоат транспорти бекатлари йўловчилар учун тушиб чиқишга қулай тарзда қайта лойиҳалаштирилди.
Шунингдек, чорраҳага давомийлиги оқимга қараб мослашадиган интеллектуал светофорлар тизими ташкил этилди.
Бу каби лойиҳалар натижасида чорраҳаларнинг ўтказиш қобилияти сезиларли даражада ошиб, тирбандликлар камаяди, жамоат транспорти янада самарали бўлади.
Президент бу ишларни кенгайтириш, “шаҳар – пиёдалар учун” тамойилини тўлиқ рўёбга чиқариш бўйича мутасаддиларга тегишли кўрсатмалар берди.
Аввалроқ экологик вазиятни машиналар эвазига яхшилаш маълум бўлганди. Машиналар экологик текширув натижасидан келиб чиқиб "қизил", "сариқ" ёки "яшил" тоифаларга ажратилади.
