Тошкент вилоятидаги портлашларда икки киши қурбон бўлди
Бир киши эса шошилинч равишда шифохонага ётқизилган, ҳар иккала ҳодиса юзасидан махсус текшириш комиссияси тузилган.
Тошкент вилоятида икки бахтсиз ҳодиса икки нафар фуқаро ҳалок бўлди. Бу ҳақида вилоят Камбағалликни қисқартириш ва бандлик бошқармаси эълон қилган икки буйруқда маълум қилинган.
Буйруқлар бир ҳафталик фарқ билан, жорий йилнинг 21 ва 27 феврал кунлари эълон қилинган.
Биринчи ҳужжатга кўра, Тошкент туманидаги Сабзавот маҳалласидаги кўп қаватли тураржойда фуқаровий тусдаги шартнома асосида ишлаётган С.С болгарка билан бочкани кесаётган вақтида чақнаш сабаб вафот этган.
Бундан ташқари, Чиноз туманида ғилдиракларни таъмирлаш участкасида икки уста юк машинаси ғилдирагини таъмирлаётганда у портлаб кетган. Оқибатда устахонадаги ҳайдовчи Х.Х вафот этган ва Д.Н Чиноз тиббиёт бирлашмасига ётқизилган.
Ҳар иккала ҳодиса юзасидан махсус текшириш комиссияси тузилган ва ўрганилиши белгиланган. Махсус текшириш комиссияси бахтсиз ҳодиса сабабларини ўрганади ва тегишли жойларга тақдим этади.
