Андижонда фуқаро катта пул билан ушланди
Ижтимоий тармоқларда тарқалган хабарларга кўра, у Андижон вилояти ҳокимининг жияни экани айтилмоқда.
Андижонда Қ.Ш.У. исмли фуқаро Жиноят кодексининг 168-моддаси 3-қисми “а,б” бандлари ва 28,211-моддаси 2-қисми “б” банди билан айблан, айни пайтда унга нисбатан қамоқ чораси қўлланилган.
Ижтимоий тармоқларда тарқалган хабарларга кўра, у Андижон вилояти ҳокими Шуҳрат Абдураҳмоновнинг жияни экани айтилмоқда. У 2 нафар таниши билан олдиндан жиноий тил бириктирган ва бир фуқарога 0,14 га. ер майдонида уй қуриши мумкинлигини айтишган.
Ерни 9 минг долларга сотишга келишиб, сўралган пулларни берганидан сўнг кадастр органларида ишловчи мансабдор танишлари орқали кадастр ҳужжатларини турар жой сифатида расмийлаштириб беришларини билдиришган.
Департамент ва ДХХ ходимлари уларни ушлаган, 9 минг доллар ашёвий далил тариқасида олинган.
Хабарга кўра, бу фуқаро 2015 йилда ҳам Андижон шаҳридан танишлари орқали нотурар бино қилиб беришни айтиб, пул олганда тезкор тадбир давомида ушланган.
Ўшанда унга 8 йил муддатга озодликдан маҳрум қилиш жазосини тайинланган. Кейинроқ жазо ахлоқ тузатиш ишларига алмаштирилган ва 2019 йилда озодликка чиққан.
Айни пайтда Қ.Ш.У. хавфли рецидивист деб эълон қилинган ва 2 шериги билан қамоққа олинган.
