Болаларни китобга қайтариш учун ёзувчилар етарлими? Адабиётлар-чи? (видео)

Биламизки, ёз фаслида болажонлар таътилга чиқишади. Бу давр мобайнида ёзги таътилни мазмунли ўтказиш учун кимдир оромгоҳларга борса, кимдир қўшимча дарслар билан машғул бўлади, яна кимдир китоб мутолаа қилади. Шу ўринда муҳим савол: болаларга таътилда ўқиш учун қандай адабиётлар бор? Бугун бизда болалар адабиётининг имкониятлари қай даражада, болалар қандай турдаги китобларни севиб мутолаа қилишади, уларга қандай китоблар кўпроқ тавсия этилади? 

Биринчи ўринда нашриётларда болалар адабиётига эътибор қай даражада эканлиги ва уларга қандай китоблар тавсия этилишини билиш мақсадида нашриётлар мутахассисларига мурожаат қилдик.

Мутахассисларнинг тавсия беришларича, ҳозирда болалар учун  илмий, интеллектуал, психологик, тарбиявий, китоблар, шунингдек, болалар энциклопедиялари, луғат китоблар, туркум эртаклар фойдали ва дунёқарашини кенгайтириши учун асос бўла олади.

Бундан ташқари, болалар учун китоб фақат мазмуни, мундарижаси билан эмас, қандай безатилгани, дизайни билан ҳам уларга таъсир кўрсатади. Уларнинг диди ривожланишига хизмат қилади. Аммо бир оғриқли масала борки, бу айнан болалар ёзувчиларининг танқислигидир.

Таътилга чиққан болажонлар ва уларнинг ота-оналари билан ўтказган сўровларимизда билдикки, “Сеҳрли узук”, “Офтобойим”, “Зумрад ва Қиммат”, “Эгривой ва Тўғривой”, “Олтин тарвуз”, “Тарбия” каби китоблар болажонларимизнинг энг севимли адабиётлари бўлиб турибди ва уларни номма-ном хатосиз айтишлари бизни қувонтирди.

Шу ўринда бир маълумот: бутун дунё бўйлаб 177 нафар эксперт ўртасида  ўтказилган сўров натижаларига кўра, барча даврлардаги 100 та энг яхши болалар адабиёти рўйхатида ХХ аср ўзбек адабиётининг забардаст ижодкори Ғафур Ғуломнинг “Шум бола” асари дунёдаги энг яхши болалар адабиётининг топ 100 талигига киритилди. Болалар учун ижод қилаётган ёзувчилар учун бу натижа яхшигина илҳом берса ажабмас.

Одинахон Деҳқонова