Жамоатчилик назорати кучини кўрсатди
Ижтимоий тармоқларда фуқароларнинг Юнусобод туманида 8-мавзе,17, 19 ва 20-уйлар оралиғида олиб борилаётган қурилиш ишларидан норозилиги манзилга чиқиб атрофлича ўрганилгач, адолатли ечим топилди.
Ушбу ҳолат Тошкент шаҳар ҳокимлиги ва ваколатли давлат ташкилотлари томонидан манзилга чиқиб атрофлича ўрганилган.
Аниқланишича, Тошкент шаҳар ҳокимининг 2018 йил 5 февралдаги 187-сонли қарори билан "FRANCHISING INVEST" МЧЖга Юнусобод тумани, 8-мавзе 17, 19 ва 20-уйлар оралиғидаги 1,23 гектардан иборат ер майдони мавжуд автотураргоҳни ўз ҳисобидан бузиш ва ўрнатилган тартибда етказилган зарарларни қоплаш ҳамда аҳолининг розилигини олиш шарти билан кўп қаватли бино қуриш учун ажратиб берилган.
"Аҳоли розилигини олиш муҳим шарт сифатида белгиланган", дейилади ҳокимлик хабарида.
Шунга кўра, қурувчи компания бу ҳудуддаги бунёдкорлик ишларини шу ҳудудда яшовчи аҳолининг розилиги билангина бошлаши мумкин.
19 май куни Қурилиш ташкилоти Тошкент шаҳар Қурилиш ва уй-жой коммунал хўжалиги бош бошқармаси томонидан қурилишни аҳолининг розилигисиз бошламаслик, акс ҳолда лойиҳа ва лойиҳа олди ҳужжатлари бекор қилиниши хусусида расман огоҳлантирилди.
