Ким Чен Ин урушга тайёргарлик ҳаракатларини кучайтиришни буюрди

Шимолий Корея етакчиси Ким Чен Ин AҚШнинг “мисли кўрилмаган ҳийлалари” туфайли мамлакат урушга тайёргарлик кўриш ҳаракатларини кучайтириши кераклигини айтди. Бу ҳақда Корея марказий ахборот агентлиги хабар берди.

Ким Чен Ин Корея Меҳнат партияси Марказий қўмитасининг  IX пленумида сўзга чиқиб, “курашнинг умумий йўналиши”ни белгилаб берди ва 2024 йилдаги “жанговар вазифалар” ҳақида гапирди. 

Ўзининг якуний нутқида у КХДР армияси ва ҳарбий саноати олдига урушга тайёргарликни кучайтириш бўйича мақсадлар қўйди, дейилади хабарда.

Шунингдек, ушбу вазифалар “AҚШ ва унинг иттифоқчиларининг фитналари туфайли кескинлашган ҳарбий-сиёсий вазиятни чуқур таҳлил қилиш асосида” қўйилгани айтилган. 

Ўз навбатида Жанубий Корея разведкаси Шимолнинг ҳаракатлари фонида фавқулодда режимга ўтган.

Аввалроқ Шимолий Корея баллистик ракетани синовдан ўтказгани, бу Японияни жиддий ташвишга солгани хабар берилганди. 
​