Ўзбек футболчиси "Россия чемпионати кашфиёти" деб аталди
Файзуллаев шу йилнинг август ойида ЦСКА билан шартнома тузганди.
Москванинг ЦСКА клуби собиқ футболчиси Валерий Масалитин клубнинг ўзбекистонлик футболчиси Аббосбек Файзуллаевни Россия Премьер-лигаси (РПЛ) биринчи қисмининг кашфиёти деб атади. Бу ҳақда Vprognoze.ru хабар бермоқда.
“Мен уни бу мавсумдан олдин кўрмаган эдим. Файзуллаев РПЛга келди ва кўрсатган натижалари ҳурмат уйғотади. Қолаверса, Аббосбек ёш. Шунинг учун у ҳали ҳам ривожланиши мумкин, - деди Масалитин.
Эслатиб ўтамиз, РПЛнинг жорий мавсумида Файзуллаев 13 та ўйинда майдонга тушиб, 2 та гол урди.
Файзуллаев, шунингдек Халқаро футбол тарихи ва статистикаси федерацияси (IFFHS) томонидан 2023 йилнинг энг яхши ёш футболчиси унвонига номзод бўлди.
Аббосбек Файзуллаев шу йилнинг август ойида ЦСКА билан шартнома тузганди. Бунгача у "Пахтакор" ёшлар жамоасида тўп сурган.
