Макрон Ўзбекистонга келади

Франция президенти Эммануэл Макрон 1 ва 2 ноябр кунлари Қозоғистонга, сўнгра Ўзбекистонга расмий ташриф билан боради, дейилади Елисей саройи расмий баёнотида.

“Ушбу сафарлар Марказий Осиёнинг ушбу икки давлати билан муносабатларни чуқурлаштириш контекстида амалга оширилмоқда”, — дейилади баёнотда.

Франция икки давлатни ислоҳот ва модернизация борасидаги саъй-ҳаракатларини қўллаб-қувватлайди, ҳамкорликни диверсификация қилишга ёрдам беради, уларнинг мустақиллиги ва суверенитетини, шунингдек, Европа билан алоқаларни мустаҳкамлаш истагини қўллаб-қувватлайди, дея таъкидлади президент Макрон маъмурияти.

“Франция ва бу икки давлат ўртасидаги яқинлашув иқтисодий соҳада, хусусан, энергетика, муҳим хомашё етказиб бериш, транспорт инфратузилмаси, соғлиқни сақлаш, қишлоқ хўжалиги-озиқ-овқат мустақиллиги ва ҳатто мудофаа соҳасида амалга оширилмоқда”, - дея таъкидлади Елисей саройи маъмурияти.

Таъкидлаш жоизки, Макроннинг ташрифи аввалроқ, унинг Шавкат Мирзиёев номига йўллаган табрикномасида маълум бўлганди.

Мазкур ташриф Франция президентларининг Ўзбекистонга иккинчи ташрифи бўлади. 1994 йилда Француа Миттеран илк бор мамлакатга келганди.