Париж суди Макроннинг рафиқасини кибербуллинг қилган ўн кишини айбдор деб топди
Улар Брижит Макронга нисбатан жинсга оид ҳақоратли изоҳлар ва ёлғон даъволар тарқатган.
Париж суди Брижит Макронга қарши кибербуллинг (онлайн таъқиб ва мазах қилиш) уюштирган 10 кишини айбдор деб топди.
Франция пойтахти Парижда суд президент Эммануэл Макроннинг рафиқаси Брижит Макронга нисбатан жинсга оид ҳақоратли изоҳлар ва ёлғон даъволар тарқатганликда 10 нафар шахсни айбдор деб топди.
Душанба куни ёши 41 дан 65 гача бўлган саккиз нафар эркак ва икки нафар аёл судланувчилари Брижит Макроннинг жинси ва жинсий ориентацияси ҳақида изоҳлар қолдирганликда, шунингдек, унинг эри билан ёш фарқини педофилияга қиёслаганликда айбдор деб топилди.
48 ёшли Эммануэл Макрон ва 72 ёшли биринчи хоним Брижит Макрон 2017 йилда у президент бўлганидан бери жамоатчиликнинг кучли эътибор марказида бўлиб келмоқда. Улар Брижит Макрон Эммануэл Макрон ўқиган мактабда драма фани ўқитувчиси бўлиб ишлаган пайтда танишган.
Брижит Макрон ҳақида ижтимоий тармоқларда у аслида акасининг исми бўлган Жан-Мишел Трогнё номи билан туғилгани ҳақидаги асоссиз даъволар кенг тарқалди.
5 январ куни саккиз нафар шахс тўрт ойдан саккиз ойгача бўлган шартли қамоқ жазосига ҳукм қилинди. Тўққизинчи эркак суд мажлисида қатнашмагани сабабли олти ой қамоқ жазосига маҳкум этилди. Охирги шахс эса интернетдан тўғри фойдаланиш учун махсус курсдан ўтиши белгиланди.
Прокурорлар судланувчилар орасида энг оғир жазони ижтимоий тармоқларда Зое Саган номи билан танилган 41 ёшли Аурелиэн Пуарсен-Атланга берилишини сўради.
Айбланувчилардан яна бири, 56 ёшли Бертран Шоллер, суд жараёнида у ўзининг конституцион эркин фикрлаш ҳуқуқидан фойдаланганини маълум қилди.
Макронлар узоқ вақт давомида бу ёлғон даъволарни эътиборсиз қолдирган бўлсалар-да, яқинда мазкур изоҳлар юзасидан судга мурожаат қилишди.
Брижит Макроннинг қизи Типхен Озер судда онасининг ҳаёти онлайн таъқиблар кучайганидан буён ёмонлашганини айтиб гувоҳлик берди. Унинг сўзларига кўра, бу ҳолат бутун оилага, жумладан Макроннинг невараларига ҳам таъсир кўрсатган.
Якшанба оқшомида Брижит Макрон ТФ1 телеканалига берган интервьюсида кибербуллингга қарши кураши бошқаларга ҳам ўрнак бўлишидан умид қилишини айтди.
“Мен ўсмирларга таъқибларга қарши курашишда ёрдам бермоқчиман. Агар ўзим намуна бўлмасам, бу қийин бўлади,” дея қўшимча қилди у.
Шунингдек, Макронлар АҚШда ўнг қанот блогери ва инфлюэнсери Кендис Оуэнсга қарши ҳам юқори даражадаги туҳмат иши билан судга мурожаат қилган. У ҳам Брижит Макрон эркак бўлиб туғилган, деган даъволарни илгари сурган.