Ўзбекистон энергетика учун Жаҳон банкидан 46,25 млн. доллар олади

Ушбу маблағлар нималарга сарфланиши ҳам очиқланган. 

Иқтисод
16 октябрь 2023 йил
Ўзбекистон энергетика учун Жаҳон банкидан 46,25 млн. доллар олади

Ўзбекистон ҳукумати ва Жаҳон банки ўртасида  инновацион углерод ресурслари (iCRAFT) лойиҳасини молиялаштириш учун 46,25 миллион AҚШ доллари миқдорида келишув имзоланди.

Келишувга Жаҳон банки гуруҳи ва Халқаро валюта жамғармасининг Марокашда ўтказилган йиллик йиғилишлари чоғида эришилган.

Ушбу маблағлар мамлакатнинг тоза энергияга ўтиши, самарадорлигини ошириш ва энергия субсидиялари бўйича ислоҳотларни қўллаб-қувватловчи лойиҳани амалга оширишга ёрдам беради.

Жаҳон банкининг углерод активлари бўйича фонди (TCAF) томонидан молиялаштирилган iCRAFT лойиҳаси Банкнинг эмиссияларни қисқартириш бўйича тўловлар орқали сиёсат ислоҳотини қўллаб-қувватлашга қаратилган биринчи глобал ташаббусидир. У Ўзбекистонга иқлим бўйича халқаро мажбуриятларини бажаришга ва энергия ресурсларидан самарали фойдаланишни яхшилашга ёрдам берадиган фундаментал ислоҳотларни амалга оширишга кўмаклашади. 

Лойиҳа бутун дунё бўйлаб келажакдаги шунга ўхшаш операциялар учун намуна бўлиб хизмат қилади.

Ўзбекистон энергияга энг эҳтиёжманд мамлакатлардан биридир. Субсидиялар электр энергияси ва табиий газ нархларини паст даражада ушлаб туради, натижада ишлаб чиқариш ва етказиб бериш харажатларини қоплаш учун кам даромад келади. 

Ҳукумат лойиҳа маблағларининг бир қисмини электр энергияси тарифлари ошишида камбағал уй хўжаликларини ҳимоя қилиш учун ишлатиш мажбуриятини олди. 

“Биз Ўзбекистоннинг энергетика соҳасини ислоҳ қилиш ва яшил иқтисодиётни барпо этиш борасидаги изчил саъй-ҳаракатларини олқишлаймиз, – деди Жаҳон банкининг Марказий Осиё бўйича минтақавий директори Татяна Проскурякова ҳужжатларни имзолаш маросимида. 

iCRAFT лойиҳаси Париж битими доирасида Марказий Осиёдаги иқлим ва углерод газларини молиялаштириш бўйича биринчи келишув бўлиб, глобал иссиқхона газлари чиқиндиларини камайтириш орқали глобал ҳарорат кўтарилишини чеклашга қаратилган халқаро шартномадир. 

Лойиҳа, шунингдек, Ўзбекистонга углерод гази савдоси бўйича халқаро тажриба битими орқали халқаро углерод бозорларига чиқишга ёрдам беради ва мамлакат яшил иқтисодиётга ўтишни давом эттириш учун қўшимча рағбатлантиради.

© 2023 Platina.uz. Барча ҳуқуқлар ҳимояланган. «Platina.uz» сайтида жойланган маълумотлар муаллифнинг шахсий фикри. Сайтда жойланган ҳар қандай материаллардан ёзма рухсатсиз фойдаланиш тақиқланади.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 02.12.2022 санасида №051412 сонли гувоҳнома билан ОАВ сифатида рўйхатга олинган.
Platina.uz сайтида реклама жойлаштириш масаласида +998 97 022 01 10 телефон рақамига (Telegram: Platina PR) мурожаат қилинг. Таҳририят билан алоқа: info@platina.uz
18+