Жаҳон ва Осиё тараққиёт банклари Ўзбекистонга катта миқдорда қарз беради

Жаҳон банки Ўзбекистон ҳукуматига махсус имтиёзли шартлар асосида $800 млн миқдорида кредитлар шаклида молиявий ёрдам беради. Шунингдек, Осиё тараққиёт банки Ўзбекистонда 700 километрлик қишлоқ йўллари инфратузилмасини яхшилашга 240 млн долларлик қарз беради.

Жаҳон банки томонидан тақдим этилаётган молиявий ресурслар иқтисодиётнинг бир қатор муҳим тармоқларида ислоҳотларни қўллаб-қувватлаш ва зарур чора-тадбирларни амалга оширишга йўналтирилган, жумладан:

Энергетика: энергия бозорининг мустақил регуляторини яратиш ва энергия тарифларини ислоҳ қилиш. 

Темир йўл соҳаси: йўловчи ва юк ташиш нархларини шакллантириш тизимини модернизация қилиш, шунингдек, рақобатни рағбатлантириш ва соҳанинг институционал тизимини такомиллаштириш мақсадида темир йўл соҳасини ислоҳ қилиш.

Кимё саноати: кимё саноатида институционал ислоҳотлар учун замин яратиш ва йирик давлат кимё корхонаси – “Фарғонаазот” АЖни хусусийлаштириш. Ушбу чора-тадбирлардан мақсад саноатни либераллаштириш, уни модернизация қилишга хусусий сармояларни жалб этиш, кимё саноатида самарадорлик ва рақобатни оширишдан иборат.

Қишлоқ хўжалиги: экинларни диверсификация қилиш ва ҳосилдорликни ошириш учун экинларни тақсимлаш тартибини либераллаштириш ва фермерларга иқлим ўзгаришини юмшатишда ёрдам бериш.

Давлатнинг фискал мажбуриятларини бошқариш: Ўзбекистон Иқтисодиёт ва молия вазирлигининг давлат-хусусий шериклик (ДХШ) лойиҳаларидан келиб чиқадиган фискал мажбуриятларни бошқариш ва тартибга солиш соҳасида салоҳиятини ривожлантириш.

Ижтимоий ҳимоя: аҳолини ижтимоий ҳимоя қилиш тизимини такомиллаштириш, ижтимоий хизматлар қамрови ва турларини кенгайтириш, шунингдек, сифатини ошириш мақсадида Ўзбекистон Президенти ҳузуридаги Миллий ижтимоий ҳимоя агентлигини ташкил этиш.

Аёлларни таъқиб ва ​​зўравонликдан ҳимоя қилиш: оиладаги (маиший) зўравонлик учун жиноий жавобгарликни жорий этиш ва аёлларни жисмоний, жинсий, иқтисодий ва руҳий зўравонликдан ҳимоя қилиш механизмларини такомиллаштириш.

Яшил иқтисодиётга ўтиш: миллий яшил таксономияни ишлаб чиқиш - яшил (екологик тоза) фаолият ва яшил иқтисодиётни ривожлантиришга инвестицияларни таснифлаш тизими. Ушбу ташаббуснинг мақсади иқлим ўзгаришига мослашиш ва унинг иқтисодиёт учун оқибатларини юмшатиш учун зарур чораларни кўриш, атмосферага чиқиндиларнинг олдини олиш механизмларини такомиллаштириш ва "яшил" лойиҳаларга инвестицияларни жалб қилишдир.

Осиё тараққиёт банки ажратадиган маблағлар эса  ҳукуматнинг “Қишлоқ йўллари” дастурини бошлаш учун асосий ташаббус ҳисобланади. Асосий эътибор 12 та вилоят ва Қорақалпоғистон Республикасидаги маҳаллий ва хўжаликлараро қишлоқ йўлларига қаратилади. 

Натижада қишлоқ аҳоли пунктлари ва фермерларга бозорлар, мактаблар, соғлиқни сақлаш хизматлари ва туман марказларига ҳар қандай об-ҳаво шароитида бориш имкони яратилиши қайд этилган.

​