Бухорода имтиёзли кредитни "еб юборган" ҳоким ёрдамчиси қамоққа олинди
Вилоят прокуратураси ҳодиса тафсилотларини очиқлади.
Бухорода 163 млн сўм имтиёзли кредитни ўзлаштириб юборган ҳоким ёрдамчиси қамоққа олинди. Бу ҳақда Бухоро вилояти прокуратураси хабар берди.
Маълум бўлишича, Бухоро шаҳри “Абу Али ибн Сино” МФЙ ҳоким ёрдамчиси президентининг “Ҳар бир оила-тадбиркор” дастурини амалга ошириш тўғрисида”ги ПҚ-3777 сонли қарори билан берилган фуқароларга имтиёзли кредитлар ажратишдаги махсус ваколатдан мансаб мавқейини суиистеъмол қилиб, кредит маблағларини ўзлаштирган.
Хусусан, у “Абу Али ибн Сино” МФЙ ҳудудида яшамайдиган ва фаолият кўрсатмайдиган М.Ҳ., Ж.А., Н.Ғ., М.А. ва А.М. номига мототранспорт воситаси ҳамда ичимлик сувини қайта ишлаш аппаратини сотиб олиш учун 33 млн сўмдан, жами 163 млн сўмлик имтиёзли кредит ажратиб, уларни ўзлаштириш йўли билан талон-торож қилган.
Унга нисбатан жиноят иши қўзғатилиб, “қамоққа олиш” тарзидаги эҳтиёт чораси қўлланилган, дейилади хабарда.
