Тошкентдаги "маска-шоу" сабаби айтилди
Жиноят иши якуни бўйича қонуний қарор қабул қилиниши таъминланиши таъкидланган.
Ижтимоий тармоқларда Тошкентда жойлашган тўлов компаниялардан бирига ҳуқуқни муҳофаза қилувчи орган ходимлари киргани ва компаниянинг бир нечта ходимларини ҳибсга олганлиги ҳақида хабар берилди.
Тошкент шаҳар ИИББ матбуот хизмати ҳолат юзасидан маълумот берди.
Маълум бўлишича, Тошкент шаҳар ИИББ ҳузуридаги Тергов бошқармаси иш юритувида фуқароларнинг пластик карталаридан 12 миллиард сўм миқдоридаги пулларнинг ўғирланганлиги юзасидан Ўзбекистон Республикаси Жиноят кодексининг 169-моддаси (“Ўғирлик”) билан жиноят иши тергов қилинмоқда. Жиноятни тўлиқ фош қилиш ва жиноят учун жазо муқаррарлиги принсипини таъминлаш, фуқароларга етказилган моддий зарарни қоплатиш чораларини кўриш мақсадида бир қатор тергов-тезкор ҳаракатлар олиб борилмоқда. Тергов жараёнида пластик карталардаги пуллар турли тўлов тизимлари орқали хорижий давлатларга чиқиб кетганлиги аниқланган, дейилади хабарда.
Мазкур жиноят иши доирасида пойтахтдаги тўлов тизими компанияларидан бирида текширув ўтказилган. Текширув жараёнида ҳеч ким ҳибсга олинмаган, компания масъул ходимларидан ҳолат юзасидан тушунтириш олинган.
Жиноят иши якуни бўйича қонуний қарор қабул қилиниши таъминланиши таъкидланган.
