Ўзбекистонга яна санкциялар хавф солмоқда
Европа Иттифоқида ишлаб чиқарилган товарларни Россия орқали транзит қилиш муҳокама қилинмоқда, деган Еврокомиссия раҳбари Урсула фон дер Ляйен матбуот анжуманида.
Шунингдек, Еврокомиссия раҳбари Москвага санкцияларни айланиб ўтишда ёрдам қилишда гумонланаётган давлатларга экспортлар ҳам чекланиши мумкинлиги таъкидлаб ўтган.
Ўтган ҳафта Financial Times газетаси Европадан Арманистон, Қозоғистон ва Қирғизистонга етказилиши мўлжалланган жами 1 млрд евролик товарлар Россия орқали транзит қилиш жараёнида йўқолиб қолгани ҳақида мақола эълон қилган эди.
Нашрнинг маълум қилишича, Украинада уруш бошланганидан буён бошқа давлатларга Россия ҳудуди орқали етказилаётган товарларнинг деярли ярми йўқолиб қолмоқда.
Экспертларнинг билдиришича, 2022 йилда Европа Иттифоқидан МДҲ давлатларига экспорт ҳажми ниҳоятда ошиб кетган.
Айниқса, санкциялар сабабли Россияга олиб кирилиши тақиқланган товарларнинг улуши кўпайган. Бундай товарларнинг Евроиттифоқдан Беларус, Арманистон, Қозоғистон, Гуржистон, Ўзбекистон ва Қирғизистонга экспорти 2022 йилнинг мартидан ноябригача қарийб икки баробарга ўсган. Демак, МДҲ давлатларига ҳажми ошган экспорт маҳсулотларининг катта қисми Россияга йўналтирилмоқда, деган хулосага келиш мумкин.
Financial Times фикрича, бу туйнукни ёпиш осон бўлмайди. Бироқ, Европа Иттифоқи бу вазифани уддалашга санкцияларнинг 11-пакети доирасида уриниб кўрмоқчи.
Аввалроқ Еврокомиссия Россияга қарши санкцияларни четлаб ўтишнинг олдини олиш учун Европа Иттифоқидан учинчи давлатларга экспортга чекловлар жорий этишни таклиф қилган эди.
