Польша сенати: "Украина ҳам НАТОга тезроқ аъзо бўлиши керак"
Польша Сенати Швеция ва Финляндия каби Украинанинг ҳам НАТОга киришини тезлаштиришга чақирди ва июль ойида Вилнюсда бўлиб ўтадиган альянс саммитини бу йўлдаги муҳим воқеа бўлиши керак, деб ҳисоблайди. "Полские радио" шу ҳақда хабар берган.
Польша Сенати тегишли резолюцияни бир овоздан қабул қилди. "Бир йиллик даҳшатли урушдан сўнг англадикки, Украина Россияга қаршилик кўрсатиш орқали Европани ҳимоя қилмоқда ва қитъани Шарқ агрессиясидан ҳимоя қилувчи асосий бўғин бўлиб қолмоқда", — дейилади ушбу резолюцияда.
Резолюция матнида айтилишича, "Украина бугунги кунда қитъада фавқулодда жанговар тажрибага эга энг кучли армияга эга. Украина армияси НАТО қурол-яроғлари билан жадал қайта жиҳозланмоқда ва Ғарб иттифоқчилари ўнлаб йиллар давомида ишлаб чиққан оператив санъат ва тактикадан фойдаланмоқда".
"Ҳимоячилар НАТО давлатлари билан яқинроқ сиёсий ва ҳарбий ҳамкорлик орқали ҳақиқий ёрдамга муҳтож", — дейилади Польша сенатининг резолюциясида.
