Ҳомиладор аёл рецидивист номини олди
Воқеа 2023 йил 23 март куни соат 12:00 ларда Ҳазорасп универсал савдо комплексида юз берган. Савдо комплексида жойлашган 30 ёшли М.Ф.нинг дўконига кирган аёл у ерда бошқа харидорлар ҳам савдо қилаётганидан фойдаланиб, дўкон эгасини чалғитган ва касса ичида бўлган жами 2.5 млн. сўм пулларни яширин равишда талон-торож қилиб, ҳодиса содир бўлган жойдан яширинган.
Олиб борилган тергов-тезкор ҳаракатлари натижасида, мазкур жиноятни амалга оширган шахс Ҳазорасп туманида яшовчи 37 ёшли Ж.З. (аёл) эканлиги аниқланиб, ундан 2.5 млн. сўм пул ашёвий далил тариқасида расмийлаштириб олинган. Рецидивист аёл муқаддам жорий йилнинг 15 март куни ЖИБ Ҳазорасп туман суди томонидан Ўзбекистон Республикаси Жиноят кодекснинг 169-моддаси 3-қисми “а” банди (ўғирлик) билан айбли деб топилган ва 3 йил муддатга озодликни чеклаш жазоси тайинланган эди.
Навбатдаги жиноят юзасидан Ўзбекистон Республикаси ИИВ ҳузуридаги Тергов департаменти Ҳазорасп тумани ИИБ ҳузуридаги тергов гуруҳи томонидан Ж.З.га нисбатан Ўзбекистон Республикаси Жиноят кодекснинг 169-моддаси 3-қисми “б” банди (ўғирлик) билан жиноят иши қўзғатилган.
Олиб борилган дастлабки тергов натижасига кўра, Ж.З.га нисбатан Ўзбекистон Республикаси ЖКнинг 169-моддаси 3-қисми “б” банди билан айб эълон қилинган ва унинг ҳомиладорлигини инобатга олган ҳолда, Ж.З.га нисбатан эҳтиёт чораси сифатида “муносиб хулқ-атворда бўлиш тўғрисида тилхат” танланиб, жиноят иши айблов хулосаси билан мазмунан кўриб чиқишлик учун ЖИБ Ҳазорасп туман судига юборилган.
