Пора олган божхоначилар озодликдан маҳрум қилинди

Коррупцияга қарши курашиш агентлиги маълум қилган ҳафта давомидаги жиноий қилмишлар тафсилотларига кўра, пора олган божхоначилар қилмишига яраша жазо тайинланган. Яъни жиноят ишлари бўйича Фарғона шаҳар судида бўлиб ўтган очиқ суд мажлисида ҳудудлардаги божхона постларининг масъул лавозимларида ишлаган бир қатор мансабдорларга суд ҳукми ўқилди. 
Жиноий қилмиш тафсилотларига кўра, “Водий” ва “Қўқон” ташқи иқтисодий фаолият божхона постлари ҳамда “Фарғона” чегара божхона постида масъул лавозимларда фаолият олиб борган Ж.Х., Б.Р. ва Э.Б. лар хизмат ваколатларидан келиб чиқувчи мажбуриятларни бажармай, ўз мансабига совуққонлик билан қараб, лоқайдлик ва виждонсизларча муносабатда бўлиши натижасида давлат манфаатларига жуда кўп миқдорда зарар келтирган. 
Мисол учун, ўз манфаатини кўзлаб ва бож тўловларидан қочиб, Польша Республикасидан юртимизга олиб кирилаётган транспорт воситаларининг ҳолати, русуми ва тасниф рақами сохталаштирилган. Ёки маълум ҳақ – пора эвазига бир неча фуқароларнинг кўп миқдордаги чет элда ишлаб чиқарилган юклари тегишли расмийлаштирувларсиз божхона назоратидан ўтказиб юборилган.
Суд томонидан уларга нисбатан Ўзбекистон Республикаси Жиноят кодексининг тегишли моддалари билан озодликдан маҳрум қилиш жазоси тайинланди.