Москвада Ўзбекистон фуқаролари иштирокида оммавий муштлашув содир бўлди
Ижтимоий тармоқлар ва интернет нашрларида Москвадаги қурилишда Тожикистон ва Ўзбекистон фуқаролари оммавий муштлашгани ҳақида хабар тарқалди.
Москва шаҳридаги “Ант Япи” корхонаси қурилиш обектида ишлаётган Ўзбекистон фуқаролари иштирокида оммавий муштлашув содир бўлгани ҳақида Ташқи меҳнат миграцияси агентлиги қуйидагиларни маълум қилди.
Консуллик бўлими ва Ташқи меҳнат миграцияси агентлигининг Москвадаги ваколатхонаси ходимлари воқеа жойига бориб, обектда қурилиш ишлари вақтинча тўхтатилганини, ишчиларнинг яшаш жойи ва ҳудуд полиция ҳимояси остида эканига ишонч ҳосил қилди.
Маълум бўлишича, оммавий муштлашувга шу йилнинг 18 март куни ошхонада навбат кутиш вақтида юзага келган тушунмовчилик сабаб бўлган. Тортишув 50-60 нафар фуқаро иштирокида оммавий муштлашувга айланган.
Воқеа жойига зудлик билан етиб келган ички ишлар ходимлари томонидан олиб борилган тезкор тадбирлар натижасида 40 га яқин ходим қўлга олиниб, вазиятга ойдинлик киритиш учун ички ишлар бўлимига олиб кетилган.
Таъкидлаш керак, мавжуд маълумотларга кўра, қўлга олинганлар сўроқ қилиниб, тушунтириш хати ёзилгач, қўйиб юборилган.
"Оғир тан жароҳати олган ва жабрланганлар орасида Ўзбекистон фуқаролари йўқ. Яқин кунларда консуллик бўлими ва Ташқи меҳнат миграцияси агентлигининг Москвадаги ваколатхонаси ходимлари вазиятга ойдинлик киритиш учун қурилиш компанияси раҳбарияти билан учрашув ўтказишни режалаштирмоқда" дейилади хабарда.
