Трамп Путин билан юзма-юз гаплашмоқчи: Россия ён берадими?
Америка санкцияларига чап беришни истаётган рус томони уч томонлама учрашув ўтказилишига ҳам қарши эмасдек кўриняпти.
АҚШ президенти Доналд Трамп яқин орада Россия етакчиси Владимир Путин билан учрашиб, Украинадаги урушни тугатиш масаласини муҳокама қилиши мумкинлигини айтди.
Гап нимада?
Доналд Трамп сайловолди дастуридаёқ Украинадаги урушни тўхтатиши ҳақида гапириб келади. У лавозимни эгаллагач, Россия томони билан фаол мулоқотга киришди. Москвага қарши риторика бир қадар юмшади, АҚШ ва россиялик мулозимлар ўртасидаги мулоқот тикланди. Бироқ, мазкур мулоқотлар амалий натижа кўрсатмади.
Бу қизиққон АҚШ президенти Трампнинг жиддий норозилигига сабаб бўлди. Демак, Россия келишувга рози бўлмаса, қаттиқ чекловларга дучор бўлади, унинг ҳамкорлари эса иккиламчи санкцияларга учрайди. Чекловлар асосан Россиядан нефт сотиб олаётган давлатларга қаратилади. Масалан, Ҳиндистонга қарши рус нефти хариди учун аллақачон 25 фоизлик бож киритилиши эълон қилинди.
Иқтибослар
“Тез орада учрашишимиз учун яхши имконият бор”, деди Трамп журналистларга Москвада ўзининг махсус вакили Стив Уиткофф ва Путин ўртасидаги музокаралар якунлари бўйича ОАВ хабарларини шарҳлар экан.
Трамп 6 август куни Россия ва АҚШ “яхши музокаралар” ўтказганини таъкидлади, аммо айни пайтда Москванинг савдо ҳамкорларига қарши кейинги иккиламчи санкцияларни истисно қилмади.
Бироқ АҚШ Давлат котиби Марко Рубио Россия ва АҚШ раҳбарларининг эҳтимолий учрашуви олдидаги “кўплаб тўсиқларни” енгиб ўтиш учун муҳим ишлар қилиниши кераклигини айтган.
"Бугун яхши кун бўлди, лекин олдимизда жуда кўп иш бор. Ҳали кўп тўсиқларни енгиб ўтишимиз керак ва биз буни келгуси кунлар, соатлар, балки ҳафталар ичида амалга оширишга умид қиламиз", деди Рубио Fox Business нашрига.
Оқ уй Америка матбуотига учрашувга тайёргарлик кўрилаётганини тасдиқлаган. Унга кўра, Трамп Путин билан учрашиши, кейин эса Украина президенти Владимир Зеленский иштирокида уч томонлама учрашув ўтказилиши мумкин.
"Руслар президент Трамп билан учрашиш истагини билдирди ваунинг ўзи эса Путин ва Зеленский билан учрашишга очиқ. Президент Трамп бу шафқатсиз уруш тугашини истайди", - дея Оқ уй матбуот котиби Кэролин Левиттнинг сўзларидан иқтибос келтирмоқда CNN.
Путиннинг ўзи Стив Уиткофф билан Кремлда бўлиб ўтган музокаралар чоғида Трамп билан учрашишга тайёрлигини маълум қилган.
Украина президенти Владимир Зеленский ҳам сўнгги янгиликларга муносабат билдириб, "Россия ўт очишни тўхтатиш кайфиятига мойил" экани ҳақида гапирди.
Эслатиб ўтамиз, Трампнинг Украинадаги урушни тўхтатишга уринишлари бесамар кетмоқда. 2025 йил март ойидаёқ Украина 30 кунлик отакесимга рози бўлди, аммо бу Россия томонидан қабул қилинмади. Трампнинг ўзи Владимир Путин олти марта телефон мулоқоти ўтказди. АҚШ президенти айниқса, охирги мулоқот самарасиз бўлгани, Путиндан кўнгли қолгани ҳақида гапирди. Сўнгра, Россияга оташкесимга эришиш учун 50 кун вақт берилди, бу муддат кейинроқ 10 кунга қисқарди. Айнан 8 августга келиб муддат тугайди ва АҚШ аллақачон Россиянинг асосий савдо ҳамкорларидан бўлган Ҳиндистонга юқори божлари киритишни бошлади. Бу орада Россия Украина шаҳарларини кучли бомбардимон қилди, ўнлаб кишилар ҳалок бўлди. Таҳлилчилар буни "Путиннинг Трампга жавоби" дея баҳолади.
7 август куни эса Трампнинг махсус вакили Стив Уиткофф Москвага борди, учрашув ижобий тусда ўтгани айтилди.