Рақобат қўмитаси Лукойлга нисбатан иш қўзғатди
Компания ҳаракатлари сабаб техник олтингугуртнинг биржадаги нархи 50 фоизгача ошган.
Рақобат қўмитаси Лукойлга қарши нарх манипуляцияси бўйича иш очди.
Қўмита томонидан “Lukoil Overseas Supply and Trading Ltd” компаниясининг биржа савдолари орқали техник олтингугурт маҳсулотини реализация қилишда, шу жумладан биржа савдоларида маҳсулот ҳажмларини номувофиқ қўйиш каби манипуляция ҳолатлари орқали маҳсулот нархларини ошириш аломатлари аниқланган.
Натижада биржа савдоларида техник олтингугурт маҳсулоти нархлари ўртача 10 фоиздан 50 фоизгача ошишига сабаб бўлган.
Шу муносабат билан, Рақобат қўмитаси томонидан компанияга нисбатан “Рақобат тўғрисида”ги Қонуни ва Вазирлар Маҳкамасининг 2020 йил 18 мартдаги 170-сонли қарори билан тасдиқланган Низом талаблари бузилиши аломатлари бўйича иш қўзғатилди.
Қўзғатилган иш ўрнатилган тартибда кўриб чиқилиб, қарор қабул қилингандан сўнг қўшимча ахборот берилади.
Аввалроқ қўмита Қорақалпоғистонда 15млрд. сўмлик давлат харидларида қонун бузилиши ҳолатларини аниқлаганди.
