Oltin maʼdanlari "maxfiy xarita"sini pullamoqchi boʻlgan direktor ushlandi

DXX tomonidan joylarda firibgarlik bilan bogʻliq holatlar aniqlandi.

Samarqand shahrida geologik xizmatlar koʻrsatish faoliyati bilan shugʻullanuvchi xususiy korxona direktori kelgusida noqonuniy boylik orttirish maqsadida mahalliy fuqaroning ishonchiga kirgan. U muqaddam oʻzining Togʻ-kon sanoati va geologiya vazirligida maʼsul lavozimlarda ishlaganligi hamda oʻzida Samarqand va Jizzax viloyatlari hududlarida amalga oshirilgan geologik-qidiruv ishlari natijasida yaratilgan oltin maʼdanlari joylashgan maxfiy geologik xarita va fotosuratlar borligini aytib, ularni 25 ming AQSh dollariga sotishini aytadi.

DXXning Samarqand viloyati boʻyicha boshqarmasi xodimlari tomonidan oʻtkazilgan tezkor tadbirda mazkur shaxs kelishilgan pullardan 10 000 AQSh dollarini olgan vaqtida ashyoviy dalillar bilan ushlandi.

Tegishli tashkilotlar bergan xulosaga koʻra, ushbu shaxs iddao qilayotgan hech bir maʼlumot maxfiy hisoblanmaydi.

“Oʻztransgaz” aksiyadorlik jamiyati tarkibidagi “Muborak magistral gaz quvurlari” boshqarmasi gaz tarqatish stansiyasi boʻlimi Shahrisabz GTS operatori Qarshi shahrida yashovchi fuqaroni yuqori lavozimdagi tanishlari orqali “Oʻztransgaz” aksiyadorlik jamiyati tizimidagi tashkilotlardan biriga nazoratchi lavozimiga ishga olinishi uchun 4 000 AQSh dollari talab qiladi.

DXXning Qashqadaryo viloyati boʻyicha boshqarmasi hamda IJQK Departamenti hamkorligida oʻtkazilgan tezkor tadbirda operator soʻralgan 4000 AQSh dollarini olgan vaqtida ushlandi.

Hozirda ushbu shaxslarga nisbatan jinoyat ishlari qoʻzgʻatilib, tergov harakatlari olib borilmoqda.

Avvalroq Buxoroda tibbiyot birlashmasi bosh hisobchisi va oʻrinbosari qoʻlga olingandi.