S&P Ўзбекистоннинг кредит рейтингини "BB+" даражасига кўтарди
Бу мамлакатимиз тарихида ҳозиргача эришилган энг юқори кўрсаткич, энди "инвестициявий" (BBB-) поғонага бир қадам қолди.

"S&P Global Ratings" халқаро агентлиги Ўзбекистоннинг суверен кредит рейтингини "барқарор" прогноз билан "BB+" даражасига кўтарди. Бу ҳақда Президент Администрацияси раҳбари Саида Мирзиёева маълум қилди.
Бу мамлакатимиз тарихида ҳозиргача эришилган энг юқори кўрсаткич, энди "инвестициявий" (BBB-) поғонага бир қадам қолди.
"Бу ютуқ тизимли иқтисодий ислоҳотлар, мувозанатли молия сиёсати ҳамда Президентимизнинг узоқни кўзлаган стратегик ёндашуви самарасидир. Ижобий натижаларимизни тақдим этиш борасида ишчи гуруҳимизнинг тезкор ва очиқ таҳлилий мулоқотлари "S&P" томонидан алоҳида эътироф этилди.
Юртимизга бўлган ишончни мустаҳкамлаш, инвестициявий жозибадорликни ошириш йўлидаги қатъий ҳаракатимизни давом эттирамиз", дея ёзади Мирзиёева.





