Қибрайдаги реабилитация марказида болаларга девор ювдирилди
Соғлиқни сақлаш вазирлиги болалар хўжалик ишлари бўйича мудиранинг қарори билан тозалаш ишларига жалб қилинганини маълум қилди. Айбдор ходимларга нисбатан чоралар кўрилишини маълум қилинди.
12 ноябрь куни ижтимоий тармоқларда Тошкент вилояти Қибрай туманидаги Республика болалар тиббий реабилитация марказида бемор болалар ва ўсмирлар деворларни юваётгани акс этган видео тарқалди.
Болалар омбудсмани Сурайё Раҳмонова ҳолатни назоратга олди. Унинг Тошкент вилояти бўйича вакили текширув ўтказиш учун воқеа жойига борди.
Ўзбекистон Соғлиқни сақлаш вазирлиги болалар хўжалик ишлари бўйича мудиранинг қарори билан тозалаш ишларига жалб қилинганини маълум қилди.
Хизмат текширувининг дастлабки натижаларига кўра, 11 ноябрь куни бўлимнинг хўжалик ишлари бўйича ҳамшираси М. А. соат 7:20 да ишга келган ва тозаликни текшираётганида йўлак деворларида оёқ изларини аниқлаган. Шундан сўнг из қолдирган болалар деворларни ювишга жалб қилинган.
Соғлиқни сақлаш вазирлиги ишчи гуруҳ текшируви якунларига кўра, айбдор ходимларга нисбатан чоралар кўрилишини билдирди.
Реабилитация маркази март ойида иш бошлаган. Унда асаб тизими касалликлари, ортопедик бузилишлар, нафас йўллари ва ошқозон-ичак тракти касалликлари бўлган 18 ёшгача болаларга реабилитация хизматлари кўрсатилади.
