Ўзбекистонда ўлимлар ўтган йилга нисбатан камайди

Ўзбекистонда 2026 йилнинг январь—сентябрь ойларида 123,4 мингта ўлим ҳолати қайд этилди. Бу ҳақда Миллий статистика қўмитасининг 27 октябрда эълон қилинган демографик ҳолатга оид ҳисоботида айтилди.

2025 йилнинг мос даврида 132,2 минг киши вафот этган. Жорий йилнинг тўққиз ойида эса бу кўрсаткич 8,8 минг нафарга ёки қарийб 6,7 фоизга камайган. Ўлим коэффициенти 4,2 промиллени ташкил этган.

Ҳисоботда сўнгги беш йилнинг январь—сентябрь ойларида қайд этилган ўлим ҳолатлари сони ҳам келтирилган:

• 2022 йил — 130,2 минг киши;

• 2023 йил — 129,7 минг киши;

• 2024 йил — 131,7 минг киши;

• 2025 йил — 132,2 минг киши;

• 2026 йил — 123,4 минг киши.

Шундай қилиб, 2026 йилнинг дастлабки тўққиз ойида қайд этилган ўлимлар сони сўнгги беш йилнинг мос даврлари орасида энг паст кўрсаткич бўлган.

Вафот этганларнинг 68,5 минг нафари ёки 55,5 фоизини эркаклар, 54,9 минг нафари ёки 44,5 фоизини аёллар ташкил қилган. Эркаклар орасидаги ўлим ҳолатлари аёлларникидан 13,6 мингтага кўп бўлган.

Яшаш жойи бўйича таҳлил қилинганда, вафот этганларнинг 65,7 минг нафари ёки 53,2 фоизи шаҳар жойларда, 57,7 минг нафари ёки 46,8 фоизи қишлоқ жойларда яшагани аниқланган.

Шунингдек, 2026 йилнинг январь—сентябрь ойларида мамлакатда 638,6 минг нафар бола тирик туғилган. Бу ўтган йилнинг мос даврига нисбатан 26 минг нафарга кам. Туғилиш ва ўлим кўрсаткичлари ўртасидаги фарқ ҳисобига аҳолининг табиий ўсиши 515,2 минг кишини ташкил этган. Доимий аҳоли сони 39 млн 535,2 минг кишини ташкил қилмоқда.

Аввалроқ Ўзбекистонда ўртача ойлик иш ҳақи 7,3 млн сўмни ташкил этгани хабар берилганди.