5 йилда 30 нафар талаба “Эл-юрт умиди” стипендиантлик мақомидан маҳрум қилинди
Бунга талабаларнинг баъзилари Ўзбекистонга қайтиб келмаганлиги, ўз мажбуриятларини бажармаганлиги, академик ўзлаштириш кўрсаткичлари сурункасига тушиб кетганлиги сабаб бўлган.
“Эл-юрт умиди” жамғармаси томонидан беш йил ичида 30 нафар талаба стипендиантлик мақомидан маҳрум қилинган. Уларга нисбатан қонуний равишда, суд тартибида одил судлов орқали тегишли қарорлар қабул қилинган. Бу ҳақда “Эл-юрт умиди” жамғармаси ижрочи директори Гулноза Исмаилова маълум қилди.
Унга кўра, талабаларнинг баъзилари Ўзбекистонга қайтиб келмаганлиги, ўз мажбуриятларини бажармаганлиги, академик ўзлаштириш кўрсаткичлари сурункасига тушиб кетганлиги ва тўрт томонлама шартнома мажбуриятларини бажармаганлиги уларни стипендиантлик мақомидан маҳрум қилишга сабаб бўлган.
“Булар, албатта, қонуний равишда, суд тартибида, одил судлов орқали амалга оширилди ва тегишли равишда қарорлар қабул қилинди”, — дейди жамғарма ижрочи директори.
Исмаилованинг айтишича, ҳозирги вақтда биринчи мартда стипендиантлар учун КПИ тизими жорий қилинган.
Мазкур тизим орқали уларнинг ўқиш давридаги академик ўзлаштириши, биринчи навбатда, ҳар бир семестрда оладиган кредитлари, яъни фанлари доирасида назорат тўлиқ йўлга қўйилган.
“Бугунги кунда „Эл-юрт умиди“ жамғармаси томонидан ўқиб, қайтиб келган стипендиантларимизнинг сони икки минг беш юздан ошди ва ҳозирги кунда улар турли соҳаларда, турли давлат органларида ўз фаолиятларини амалга оширишмоқда”, — дейди Гулноза Исмаилова.
