Ўзбекистондаги масжидларга сиреналар ўрнатилмоқда. Нега?
Масжидлар орқали огоҳлантириш тахминан 6,5 млн нафар аҳолини, жумладан аёллар, эркаклар, болалар ва аҳолининг заиф қатламларини қамраб олиш имконини беради.
Тармоқларда республиканинг турли ҳудудларидаги масжидларга сиреналар ўрнатилиб, улар синовдан ўтказилаётгани тўғрисида хабарлар тарқалди.
Фавқулодда вазиятлар вазирлиги матбуот хизматининг ОАВга маълум қилишича, бу аҳолини эрта огоҳлантириш тизими қамровини кенгайтиришга қаратилган ечим ҳисобланади.
ФВВ масъулига кўра, ушбу ташаббус ФВВ ва БМТ Тараққиёт дастури Қўшма лойиҳаси асосида амалга оширилмоқда. Ташаббус доирасида аҳоли пунктларига яқин жойлашган масжидларга махсус ускуналар ўрнатиляпти. Бу эса ФВВнинг тезкор хабарларини масжидларнинг ташқи овоз кучайтиргичлари орқали узатиш ҳамда ахборотни кенг жамоатчиликка тезкор етказиш имконини беради.
Қурилмалар асосан табиий хавфлар юқори бўлган 7 та вилоят — Жиззах, Қашқадарё, Наманган, Самарқанд, Сирдарё, Тошкент ва Фарғона вилоятларидаги 272 та масжидда ўрнатилган.
Масжидлар орқали огоҳлантириш тахминан 6,5 млн нафар аҳолини, жумладан аёллар, эркаклар, болалар ва аҳолининг заиф қатламларини қамраб олиш имконини беради.
Мазкур огоҳлантириш каналининг қўшимча афзаллиги шундаки, мобил алоқа ва электр таъминотида узилишлар юзага келган тақдирда ҳам тезкор хабарларни узатиш мумкин.
