Ҳаво шари Тошкентнинг айрим ҳудудлари электрсиз қолишига сабабчи бўлди
Энергетика вазирлиги хабарига кўра, ҳодиса Қибрай туманида жойлашган "Aksa Toshkent" ИЭСда содир бўлган. Трансформаторнинг ҳимоя тизими ишга тушиб, станция қуввати 460 МВтдан 185 МВтгача камайган
19 октябрь куни Тошкентнинг Юнусобод, Олмазор, Мирзо Улуғбек ва Шайхонтоҳур туманларининг айрим ҳудудларида электр таъминотида вақтинчалик узилиш кузатилди. Бунга "Aksa Toshkent" иссиқлик электр станциясининг очиқ тақсимлаш қурилмасига ҳавода учиб келган шар тушиши сабаб бўлган.
Энергетика вазирлиги хабарига кўра, ҳодиса соат 19:05 да Қибрай туманида жойлашган "Aksa Toshkent" ИЭСда содир бўлган. Оқибатда трансформаторнинг ҳимоя тизими ишга тушиб, станция қуввати 460 МВтдан 185 МВтгача камайган.
Дастлабки маълумотларга кўра, узилишга станциянинг Т-5 трансформаторидаги шикастланиш сабаб бўлган. Ҳодиса кузатув камералари ёзувларида ҳам акс этган.
Кўрилган тезкор чоралар натижасида соат 19:09 да Юнусобод ва Олмазор туманларида электр таъминоти қисман тикланган. Соат 19:25 да захира манбалари орқали электр таъминоти тўлиқ тикланган. Соат 19:38 га келиб эса барча истеъмолчилар электр энергияси билан қайта таъминланган.
