Тошкентда иссиқ бошланиши билан чироқ ўчиши кўп кузатиляпти

Пойтахт Тошкент шаҳрида иссиқ бошлангандан бери электр таъминотида кўп узилишлар бўляпти. Мутасаддилар ушбу ҳолатни аномал иссиққа тайёргарлик билан изоҳлаган.

Бу чироқ ўчиришлари "истеъмолчиларга сифатли ва барқарор электр энергиясини етказиб берилишини таъминлаш, электр тармоқларида содир бўлиши мумкин бўлган авария ҳолатларининг олдини олиш ҳамда таъмирлаш ишларини хавфсиз бажариш мақсадида" амалга оширилаётгани айтилган.

Жумладан, бугун, 8 июнь куни ҳам қуйидаги манзилларда электр таъминоти вақтинча тўхтатилган:

• Чилонзор туманининг “Боғистон” ва “Лутфий” МФЙлари айрим ҳудудларида соат 09:00 дан 17:00 гача;
• Бектемир туманининг “Ийк ота” МФЙнинг Имон (Маърифат), Мевазор, Ораста ҳамда Тараққиёт кўчалари ҳудудида соат 09:00 дан 17:00 гача;
• Мирзо Улуғбек туманининг “Ш.Бурхонов”, “Катта қорасув”, “Бўз”, “Алпомиш”, “Подшобоғ” ва “Ялонғоч” МФЙлари ҳудудларида соат 09:00 дан 12:00 гача электр таъминоти вақтинча тўхтатилди.

Кўриб турганингиздек, айрим ҳудудларда ток 8 соатлаб бўлмайди.

Ижтимоий тармоқ фойдаланувчилари бу ҳолатга эътирозини билдириб, қишлоқларда аҳвол бундан яхшироқ эканини ёзишган.