Марко Рубио 17-22 октябрь кунлари Ўзбекистон ва Ҳиндистонга ташриф буюради
Савдо-иқтисодий ҳамкорликни кенгайтириш истиқболларини муҳокама қилиш учун Ўзбекистонга АҚШнинг йирик компанияларидан 200 дан ортиқ вакиллар келади.
АҚШ Давлат котиби Марко Рубио 17-22 октябрь кунлари Ўзбекистон ва Ҳиндистонга ташриф буюриб, у ерда қатор икки томонлама ва кўп томонлама учрашувлар ўтказади.
Бу ҳақда АҚШ Давлат департаментининг 13 октябрь куни эълон қилинган баёнотида сўз боради.
Самарқандда Рубио АҚШ ва Марказий Осиёнинг бешта давлати — Қозоғистон, Қирғизистон, Тожикистон, Туркманистон ва Ўзбекистонни бирлаштирган "C5+1" форматидаги ташқи ишлар вазирлари учрашувида иштирок этади.
Иштирокчилар АҚШ ва Марказий Осиё мамлакатларида тинчликни мустаҳкамлаш ҳамда фаровонликни таъминлашга қаратилган стратегик ҳамкорликни ривожлантириш масалаларини муҳокама қиладилар.
Давлат котиби, шунингдек, минтақа давлатлари вакиллари билан икки томонлама учрашувлар ўтказади. Бундан ташқари, савдо-иқтисодий ҳамкорликни кенгайтириш истиқболларини муҳокама қилиш учун Ўзбекистонга АҚШнинг йирик компанияларидан 200 дан ортиқ вакиллар келади.
Nobel Systems компаниясининг маълум қилишича, президент ва бош директор Майкл Самуэль 2026 йил 19 октябрь куни Самарқанд шаҳрида бўлиб ўтадиган бизнес дастурида иштирок этиш учун АҚШнинг Ўзбекистонга юқори даражадаги бизнес делегацияси таркибига киритилди.
Ташкилотчилар савдо, инвестициялар ва минтақавий иқтисодий ривожланиш масалалари бўйича юқори мартабали давлат амалдорлари ва бизнес етакчилари билан мулоқот қилиш учун АҚШ ва Марказий Осиёнинг 100 дан ортиқ йирик компаниялари иштирок этишини кутишмоқда.
Майкл Самуэлнинг ушбу таркибга танлаб олиниши Nobel Systems компанияси ва унинг кенгайиб бораётган халқаро миқёсдаги мавқеи учун муҳим қадам ҳисобланади.
