Ўзбекистонда 3,4 млн тонна пахта териб олинди
Бу жорий йил учун белгиланган 4,5 млн тоннали шартномавий кўрсаткичнинг 76 фоизини ташкил этади. Йиғиб олинган ҳосилнинг 2,6 млн тоннаси пахта териш машиналарида терилган.
Ўзбекистонда ушбу мавсум бошидан бери 3,4 млн тонна пахта териб олинди. Бу ҳақда Қишлоқ хўжалиги вазирлиги хабар берди.
12 октябрь ҳолатига кўра, Ўзбекистонда 3,4 млн тонна пахта хомашёси йиғиб олинди. Бу жорий йил учун белгиланган 4,5 млн тоннали шартномавий кўрсаткичнинг 76 фоизини ташкил этади.
Йиғиб олинган ҳосилнинг 2,6 млн тоннаси пахта териш машиналари, 848 минг тоннаси эса қўл меҳнати ёрдамида терилган. Яъни умумий теримнинг қарийб 75 фоизи механизациялашган.
Қўлда терилган пахтанинг 174 минг тоннаси далаларни техника учун тайёрлаш жараёнида, 674 минг тоннаси эса машиналар кира олмайдиган кичик майдонларда йиғиб олинган.
Бу йилги теримга 3 мингга яқин пахта териш машинаси жалб қилинган. Уларнинг мингдан ортиғи жорий йилда фермерлар ва агрокластерларга лизинг асосида етказиб берилган.
Расмий маълумотларга кўра, 12 октябрнинг ўзида машиналар ёрдамида 147 минг тонна пахта терилган. Бу ҳар бир машинага ўртача 50 тоннадан тўғри келади.
