Ўзбекистонда ҳарорат кескин пасайиб, ёмғир ёғади

Ўзбекистон ҳудудида ҳаво ҳарорати тушиб, ёғингарчилик бўлиши кутилмоқда. Гидрометеорология маркази бу ҳақда маълумот берди.

Жорий йилнинг 3 октябрь куни Ўзбекистоннинг шимолий ҳудудларига, 4–5 октябрь кунлари республиканинг қолган ҳудудларига совуқ ва нам ҳаво массалари кириб келади. Республика бўйича об-ҳавонинг кескин ўзгариши кутилмоқда.

3–4 октябрда шимолда ва чўл ҳудудларда, 4–5 октябрда республиканинг қолган ҳудудларида ёмғир ёғади, баъзи жойларда кучли бўлади, баланд тоғларда қорга айланади.

Ҳаво ҳарорати аста-секин кундуз кунлари 15–20 даражагача, кечалари 5–10 даражагача, шимолда кундуз кунлари 12–17 даражагача, кечалари 2–7 даража илиқгача пасаяди.

3–4 октябрда республика бўйича баъзи жойларда шамол тезлиги 13–18 м/с гача кучайиши кутилмоқда, айрим жойларда баъзида чанг-тўзонлар билан 20–22 м/с гача кучайиши мумкин.