Ўзбекистонда озарбайжон тили бўйича бепул курслар ташкил этилади
Машғулотлар Ҳайдар Алиев номидаги Озарбайжон маданият марказида бўлиб ўтади. Ушбу марказ Озарбайжоннинг Ўзбекистондаги элчихонаси қошида жойлашган.
Ўзбекистонда озарбайжон тилини ўрганиш истагида бўлганлар учун бепул тил курслари ташкил этилади. Бу ҳақда мамлакатнинг Ўзбекистондаги элчиси Рашад Мамедов X ижтимоий тармоғида маълум қилди.
Курслар Ҳайдар Алиев номидаги Озарбайжон маданият марказида бўлиб ўтади. Ушбу марказ Озарбайжоннинг Ўзбекистондаги элчихонаси қошида жойлашган. Курслар 30 сентябрдан бошланади ва бепул бўлади.
“Курсларда иштирок этиш орқали сиз малакали мутахассис кўмагида озарбайжон тилининг бой луғат таркиби, грамматик тузилиши ва тўғри сўзлашув қоидаларини ўрганишингиз, шунингдек, кундалик мулоқот кўникмаларингизни ривожлантиришингиз мумкин”, деди дипломатик миссия раҳбари.
Курсларда қатнашишни истаганлар қуйидаги постердаги QR-кодни сканерлаб, рўйхатдан ўтиши зарур.
