Жанубий Корея президенти қароргоҳида Шавкат Мирзиёев шарафига кечки овқат бўлиб ўтади
Yonhap агентлиги дастур менюси икки мамлакатнинг ошпазлик анъаналари ва маҳсулотларининг уйғунлигини ҳисобга олган ҳолда тузилганини таъкидлади.
Yonhap агентлигининг хабар беришича, Ўзбекистон Президенти Шавкат Мирзиёевнинг давлат ташрифи шарафига Жанубий Корея Президенти қароргоҳида корейс ошхонасидан иборат кечки овқат бўлиб ўтади.
Агентлик меню икки мамлакатнинг ошпазлик анъаналари ва маҳсулотларининг уйғунлигини ҳисобга олган ҳолда тузилганини таъкидлади.
Кечки овқат анор соуси қўшилган янги омар ва денгиз моллюскаларидан тайёрланган таом билан бошланади. Ундан кейин ширин қовоқ ва хурмо қўшилган таракчук сутли бўтқаси, Нобиани услубида пиширилган мол гўшти, маринадланган қўй бел гўшти, тўйимли Инчеон гуручи ва товуқ шўрваси тақдим этилади.
Десертга қуритилган хурмо қўшилган мева ва крем-брюле киради. Овқат билан бирга уч хил ичимлик, жумладан, анъанавий корейс ичимликлари ҳам тортилади.
Шунингдек, Шавкат Мирзиёевга қизил женшен маҳсулотлари тақдим этилиши эълон қилинди. Ушбу доривор ўсимлик таниқли премиум корейс соғлиқни сақлаш маҳсулотларидан биридир.
Ўзбекистоннинг биринчи хоними Зироат Мирзиёевага анъанавий корейс эстетикасини акс эттирувчи керамика совға қилинади.
Жанубий Корея президент маъмурияти Шавкат Мирзиёевнинг ташриф дастурига Ўзбекистон маданияти, корейс томонининг меҳмондўстлиги ва икки мамлакат ўртасидаги дўстликни акс эттирувчи турли элементлар киритилганини таъкидлади.
