Эстония мудофаа вазири сиёсий можаро сабаб истеъфо берди
Мамлакат Миллий аудит идораси томонидан соҳада турли муаммолар аниқланган. Хусусан, Украина учун қурол сотиб олишда қарийб 70 млн евролик шубҳали келишув имзоланган.
Эстония мудофаа вазири Ханно Певкур истеъфо берди.
У мамлакат мудофаа соҳасида Миллий аудит идораси томонидан аниқланган муаммолар учун сиёсий жавобгарликни ўз зиммасига олиб, истеъфога чиқишини эълон қилган.
Певкур бу ҳақда ERR телеканалининг "Актуална камера" дастурида жонли эфирда эълон қилди.
"Мен бу масъулиятни ўз зиммамга олишга тайёрман, мен буни қабул қиламан ва Бош вазир янги мудофаа вазирини топиши керак", деди Певкур.
Унинг сўзларига кўра, Миллий аудит идорасининг, хусусан, Эстония мудофаа кучлари ва Миллий мудофаа инвестиция маркази фаолиятига оид изоҳлари мудофаа вазирлиги раҳбариятининг сиёсий жавобгарлиги масаласини кўтаради.
"Бошқача қилиб айтганда, вазир пайпоқ ва ўқларни санамаса ҳам ёки шартномалар бўйича музокаралар олиб бормаса ҳам, Миллий аудит идорасининг, хусусан, Мудофаа кучлари ва Миллий мудофаа инвестиция маркази фаолиятига оид изоҳлари сиёсий жавобгарлик масаласини кўтаради. Шунинг учун, мен бугун бутун мудофаа сектори учун сиёсий жавобгарликни ўз зиммамга олиш ва ўз вақтида мудофаа вазири лавозимини Бош вазирга топшириш тўғри деб ҳисоблайман", деб таъкидлади Певкур.
Шу билан бирга, вазир ўз лавозимида бўлган пайтида мамлакатнинг мудофаа қобилиятини мустаҳкамлаш бўйича қабул қилинган қарорларни тўғри деб билишини таъкидлади.
"Эстония аввалгидан ҳам яхшироқ ҳимояланган", деди у.
Певкурнинг қарори мудофаа секторидаги бухгалтерия ҳисоби ва Украина учун харидлар билан боғлиқ вазиятга танқидлар фонида қабул қилинди.
Аввалроқ, Украина учун режалаштирилган ўқ-дорилар сотиб олиш доирасида Эстония илгари ўқ-дорилар савдоси билан шуғулланмаган ҳинд тадбиркорларига жами 70 миллион евро олдиндан ўтказгани ҳақида хабар берилган эди.
