“Кўзимга ёш келди”: Мустақиллик байрами тармоқларни ларзага солди

Ўзбекистон мустақиллигининг 35 йиллиги муносабати билан ўтказилган байрам тантаналари ижтимоий тармоқларда кенг муҳокама қилинди. Президент Шавкат Мирзиёевнинг нутқи, байрам сценарийси, саҳнадаги чиқишлар ва тарихий лавҳалар ижтимоий тармоқ фойдаланувчилари орасида кучли таассурот уйғотди.

Байрамга оид видео ва лавҳалар остида минглаб изоҳлар қолдирилди. Улардаги умумий кайфият бир хил: ҳайрат, ҳаяжон, фахр ва байрамона руҳ.

Айниқса, Президент Шавкат Мирзиёевнинг тантанали маросимдаги нутқи ижтимоий тармоқ фойдаланувчилари орасида кенг муҳокама қилинди. Давлат раҳбарининг Ўзбекистон босиб ўтган йўл, бугунги ўзгаришлар ва мамлакат келажаги ҳақидаги фикрлари кўплаб фойдаланувчиларда кучли таассурот қолдирганини изоҳлардан ҳам кўриш мумкин.

Байрам дастурида тарих ва бугунги кун ўртасидаги боғлиқликка ҳам алоҳида урғу берилди. Саҳнада Ўзбекистон мустақиллигининг эълон қилиниши билан боғлиқ тарихий кадрлар намойиш этилди, мамлакатнинг ўтган 35 йиллик йўли ва бугунги қиёфаси турли саҳнавий ечимлар орқали акс эттирилди.

Ижтимоий тармоқлардаги муносабатларга қараганда, томошабинлар бу йилги байрамда айнан шу жиҳатни — тарих, бугун ва келажакнинг бир сценарийда уйғунлашганини юқори баҳолаган.

Кўплаб фойдаланувчилар байрамни “таъсирли”, “ҳаяжонли”, “ўзгача” дея таърифлаб, айрим саҳналарни кўриб кўзига ёш келганини, мамлакат учун фахр туйғусини ҳис қилганини ёзган.

Шу маънода, бу йилги Истиқлол тантанаси фақат саҳнада эмас, ижтимоий тармоқларда ҳам давом этди. Байрамга оид кадрлар тарқалиши билан улар атрофида катта муҳокама ва самимий муносабат шаклланди.

Минглаб изоҳларда билдирилган фикрларни бирлаштириб турган асосий туйғу эса битта — Мустақиллик байрами одамларда кучли ҳиссиёт уйғотди.

Бу шунчаки интернетдаги изоҳлар эмас. Бу — Мустақиллик байрами халқ қалбида уйғотган ҳаяжон, фахр ва туйғуларнинг ижтимоий тармоқлардаги акс-садоси.