Сирдарёда маҳаллий бюджетдан 17,2 млрд сўм ажратилди

Сирдарёда вилоят бюджетининг ошириб бажарилган қисмидан 17,2 миллиард сўм ажратилди. Бу ҳақда Халқ депутатлари вилоят кенгаши қарорида айтилади. Қарор 2026 йил 22 июл куни эълон қилинди.

Сирдарё вилоятида маҳаллий буджетнинг 2026 йил II чорагида режадан ортиқ шаклланган даромадлари ҳисобидан 17 миллиард 245 миллион сўм маблағни тақсимлаш бўйича қарор қабул қилинди. Қўшимча маблағлар инфратузилма, қурилиш, таъмирлаш, ободонлаштириш ва рақамли технологияларни ривожлантиришга йўналтирилмоқда.

Ажратилган маблағлар таркибида энг йирик улуш Гулистон шаҳридаги вилоят Соғлиқни сақлаш бошқармаси биносини таъмирлашга тўғри келади. Мазкур мақсад учун 6 миллиард сўм йўналтирилган бўлиб, бу умумий маблағнинг қарийб учдан бир қисмини ташкил этади. Бу қарордаги энг йирик лойиҳа ҳисобланади.

Иккинчи йирик йўналиш Янгиер шаҳридаги муҳандислик-коммуникация инфратузилмасини яхшилаш билан боғлиқ. Бобур маҳалласида якка тартибдаги уйлар ҳамда кўп қаватли турар жойларни қамраб олувчи 10 километр оқава сув тармоғини яхшилаш ишлари учун 2 миллиард 613 миллион сўм ажратилди.

Шунингдек, Ширин шаҳрида замонавий IT-марказ барпо этиш учун яна 2 миллиард сўм йўналтирилмоқда.

Қўшимча маблағларнинг салмоқли қисми маҳалла инфратузилмасини яхшилашга ҳам сарфланади. Гулистон, Сардоба ва Сирдарё туманларидаги олтита маҳалла биносини қуриш ва таъмирлаш ишлари учун жами 4 миллиард 336 миллион сўм ажратилди.

Гулистон туманидаги иккита маҳалла биносига 774 миллион сўмдан, Сардоба ва Сирдарё туманларидаги тўртта маҳаллага эса 697 миллион сўмдан маблағ йўналтирилган.

Вилоят марказини ободонлаштириш ҳам эътибордан четда қолмади. Гулистон шаҳрида кўкаламзорлаштириш, ҳудудларни ободонлаштириш ҳамда кўча ёритиш тизимини яхшилаш ишлари учун 1 миллиард сўм ажратилди.

Бундан ташқари, вилоят ҳокимлигининг Қабуллар уйини қўриқлаш хизмати харажатларини молиялаштириш учун 796 миллион сўм йўналтирилмоқда. Янгиер шаҳрида "Ақлли туман" платформаси асосида вазиятлар марказини ташкил этиш ишлари учун эса 500 миллион сўм ажратилиши белгиланди.

Таҳлил шуни кўрсатадики, қўшимча даромадларнинг асосий қисми қурилиш ва таъмирлаш лойиҳаларига йўналтирилмоқда. Хусусан, Соғлиқни сақлаш бошқармаси биноси, IT-марказ ҳамда олтита маҳалла биноси бўйича барча ишлар вилоят ҳокимлиги ҳузуридаги "Ягона буюртмачи хизмати" давлат муассасаси орқали амалга оширилади. Ушбу ташкилот зиммасига юклатилган лойиҳаларнинг умумий қиймати 12 миллиард 336 миллион сўмни ташкил этиб, бу барча ажратилган маблағларнинг қарийб 72 фоизига тенг.

Қарор билан маблағлардан фойдаланиш устидан назоратнинг бир неча босқичли тизими ҳам белгиланди. Маблағ олувчи ташкилотлар ҳар чорак якунида бажарилган ишлар юзасидан ҳисобот, фото ва видеоматериалларни тақдим этиши лозим. Зарурат туғилганда депутатларнинг доимий комиссияси объектларга чиқиб, маблағлардан фойдаланиш самарадорлигини ўрганади.

Шунингдек, амалга оширилган ишлар ҳақидаги маълумотлар вилоят ҳокимлигининг расмий веб-сайтида эълон қилиниши ҳам белгиланган.

Қарор мазмунидан кўринадики, қўшимча бюджет даромадлари, аввало, ижтимоий ва коммунал инфратузилмани яхшилашга йўналтирилмоқда.