Банк тизимидаги жами кредит қолдиғи 636 трлн сўмга етди

2026 йил 1 июн ҳолатига банк тизимининг жами кредит қолдиғи 636,0 трлн сўмни ташкил этиб, йил бошига нисбатан 5,3 фоизга ошди. Бу ҳақда Марказий банк хабар берди.

Шундан жисмоний шахсларга ажратилган кредитлар ҳажми 232,9 трлн сўмга етиб, 5,7 фоизга ўсди. Аҳоли кредитлари таркибида энг юқори улушни ипотека кредитлари эгаллаб, уларнинг ҳажми 85,2 трлн сўмга етган. Бу сегментда ярим йиллик ўсиш 7,3 фоизни ташкил этди.

Микрокредитлар ҳажми 44,9 трлн сўмга етиб, 11 фоизга ошган бўлса, микроқарзлар ҳажми 50,2 трлн сўмни ташкил этиб, 2,6 фоизга кўпайди. Бу кичик молиялаштириш инструментларига талаб сақланиб қолаётганини кўрсатади.

Жисмоний шахслар кредитлари таркибида энг юқори ўсиш кредит карталари ва овердрафтлар сегментида кузатилиб, ушбу йўналиш 24,3 фоизга кенгайди. Бу аҳолининг қисқа муддатли ликвидлик воситаларига эҳтиёжи ортаётганидан далолат беради.

Шу билан бирга, юридик шахсларга ажратилган кредитлар ҳажми 403,1 трлн сўмга етиб, йил бошига нисбатан 5,1 фоизга ошди. Корпоратив кредитлаш банк тизими кредит портфельининг асосий қисмини шакллантиришда давом этмоқда.

Юридик шахслар сегментида лизинг ва факторинг операциялари 19,7 фоизга, банклараро кредитлар эса 43,2 фоизга ошгани бизнес субъектлари учун молиялаштириш инструментлари кенгайиб бораётганини кўрсатмоқда.

Кредит портфелининг таркибий таҳлили банк тизимида ҳам аҳоли, ҳам бизнес сегментлари бўйича молиялаштириш фаоллиги сақланиб қолаётганини, айниқса уй-жой, кичик бизнес ва қисқа муддатли ликвидлик инструментларига талаб юқори эканини кўрсатмоқда.