Наманган ИИБ терговчиси ва адвокат ушланди
Дастлаб адвокат фуқарога нисбатан қўзғатилган жиноят ишини ҳал қилиш эвазига 40 минг доллар олган. Терговчи эса адвокатдан 30 минг доллар олаётганда қўлга тушди.
Терговчи ва адвокатга нисбатан жиноят иши қўзғатилди.
Наманган вилояти ИИБ Тергов бошқармаси терговчиси ўзининг иш юритувида бўлган, Чуст туманида яшовчи, 2006 й.т. фуқарога нисбатан қўзғатилган жиноят ишини унинг фойдасига ижобий ҳал қилиб, тугатиб юбориш эвазига ишга алоқадор бўлмаган адвокат орқали 40 минг АҚШ доллари талаб қилган.
Давлат хавфсизлик хизмати ходимлари томонидан Чуст туманида ўтказилган тезкор тадбирда адвокатлар ҳайъати адвокати гумонланувчининг отасидан 40 минг АҚШ долларини олган вақтида ашёвий далиллар билан ушланди.
Сўнгра тезкор тадбир давом эттирилиб, адвокатдан 30 минг АҚШ долларини олган вақтида терговчининг ноқонуний ҳаракатига чек қўйилди.
Ҳозирда терговчига нисбатан Жиноят Кодексининг 210-моддаси (пора олиш) билан, адвокатга эса ЖКнинг 212-моддаси (пора олиш-беришда воситачилик қилиш) билан жиноят иши қўзғатилиб, “қамоқ” эҳтиёт чораси қўлланилди.
