Трамп бўлажак сайловлар олдидан Пашинянни қўллаб-қувватлади
Май ойи бошида Россия президенти Владимир Путин Ереванни Европа Иттифоқи билан яқинлашишдан огоҳлантирган ва Арманистонни Европа Иттифоқига қўшилишга интилган Украина билан таққослаганди.
АҚШ президенти Доналд Трамп Арманистондаги парламент сайловларидан олдин бош вазир Никол Пашинянни қўллаб-қувватлади.
"Мен 2026 йил 7 июндаги сайловларда Николни тўлиқ қўллаб-қувватлайман", деб ёзган АҚШ президенти Доналд Трамп ўзининг Truth Social ижтимоий тармоғидаги аккаунтида.
Трамп АҚШ Давлат котиби Марко Рубио яқинда Арманистонга ташриф буюрганини ва бир қатор келишувлар бўйича ютуқларга эришганини таъкидлади. АҚШ президенти Арманистон Бош вазири Никол Пашинянни "ажойиб дўст ва етакчи" деб атади.
Трампнинг очиқ қўллаб-қувватлаши АҚШ вице-президенти Ж.Д. Вэнснинг феврал ойида Ереванга ташрифи чоғида Пашинянни қўллаб-қувватлаганидан кейин пайдо бўлди. Европа етакчилари ҳам амалдаги бош вазирни қўллаб-қувватламоқда.
Май ойи бошида Россия президенти Владимир Путин Ереванни Европа Иттифоқи билан яқинлашишдан огоҳлантирди ва Арманистонни Европа Иттифоқига қўшилишга интилган Украина билан таққослади.
Шундан сўнг, Россия ҳукумати Жермук минерал суви каби бир қатор арман маҳсулотларини импорт қилишни тақиқлади.
"Коммерсант" нашрининг хабар беришича, Москва шунингдек, агар Арманистон Европа Иттифоқига яқинлашишда давом этса, Ереванни газ, ёқилғи ва олмос етказиб бериш бўйича келишувни бекор қилиш билан таҳдид қилган.
Арманистонда парламент сайловлари 7 июн куни бўлиб ўтади. Пашиняннинг "Фуқаролик шартномаси" партияси сўровларда етакчилик қилмоқда.
