Трампнинг рейтинги яна рекорд даражада қулади
Америкаликларнинг Трампнинг иқтисодий сиёсатидан норозилиги энг сезиларли даражада ошган.
Доналд Трампнинг рейтинги яна рекорд даражада қуйи поғонага тушди.
Май ойининг иккинчи ярмида АҚШда ўтказилган сўровлар шуни кўрсатдики, Доналд Трампнинг президентлик фаолиятини маъқуллайдиганлар сони янада камайди.
Newsweek томонидан эълон қилинган American Research Group сўровига кўра, Трампнинг рейтинги унинг президентлик давридаги икки муддати давомида энг паст даражага тушиб кетган. Респондентларнинг 31 фоизи Трампнинг фаолиятини маъқуллаган, 64 фоизи эса маъқулламаган. Апрель ойида бу кўрсаткичлар мос равишда 32% ва 63% ни ташкил этди.
CNN учун ўтказилган май ойидаги сўровга кўра, респондентларнинг 65 фоизи Трампнинг фаолиятини маъқулламаслигини айтишган, атиги 35 фоизи эса маъқуллаган. Бу апрель ойига нисбатан норозиликнинг бир фоизга ошганини англатади.
Reuters/Ipsosʼнинг сўнгги сўрови шуни кўрсатадики, респондентларнинг 35 фоизи Трампнинг фаолиятини маъқуллайди, 63 фоизи эса маъқулламайди.
Рекорд даражадаги энг паст кўрсаткич - 34% ни қайд этган апрель ойи билан солиштирганда, америкаликларнинг президентни маъқуллаши ошди. Бироқ, Reuters агентлигининг таъкидлашича, Трамп иккинчи муддатини 2025 йил январь ойида 42% маъқуллаш рейтинги билан бошлаган.
The Economist ҳам шунга ўхшаш манзарани қайд этди, унда респондентларнинг 37 фоизи Трампнинг май ойидаги фаолиятини маъқуллаган, 57 фоизи эса маъқул кўрмаганлиги тахмин қилинган.
Барча сўровномаларга кўра, америкаликларнинг Трампнинг иқтисодий сиёсатидан норозилиги энг сезиларли даражада ошган.
Республикачи сайловчилар орасида Трампни қўллаб-қувватлаш ҳам камайиб бормоқда. Reuters маълумотларига кўра, май ойида рўйхатдан ўтган республикачи сайловчиларнинг 79 фоизи Трампнинг президентлик фаолиятини маъқуллаганини айтишган, апрель ойида бу кўрсаткич 82 фоиз ва унинг иккинчи муддати бошланганида 91 фоиз бўлган.
