АҚШ ҳарбий кемалари Ҳормузда Эрон ҳужумига учради

АҚШ ҳарбий манбалари CBS News телеканалига анонимлик шарти билан хабар беришича, АҚШ ҳарбий-денгиз кучларининг USS Truxtun ва USS Macon эсминецлари Ҳормуз бўғозида Эрон кучлари томонидан ҳужумга учраган.

Нашр манбаларига кўра, кемаларга Эрон қайиқлари, ракеталари ва дронлари томонидан мувофиқлаштирилган ҳужум уюштирилган. Кучли ҳужумга қарамай, эсминецларга зарар етмаган, деб аниқлик киритди манбалар.

Манбалар шунингдек, Апаче вертолётлари кузатувида АҚШ ҳарбий-денгиз кучлари кемалари Ҳормуз бўғозидан муваффақиятли ўтиб, Форс кўрфазига кирганини таъкидладилар.

АҚШ ҳарбий кемаларининг Форс кўрфазига ўтиши АҚШ президенти Доналд Трамп маъмуриятининг "Озодлик лойиҳаси" деб номланган янги ташаббусининг бир қисми бўлиб, унга кўра АҚШ ҳарбий-денгиз кучларига Ҳормуз бўғозида қолиб кетган тижорат кемаларининг хавфсиз ўтишини таъминлаш вазифаси юклатилган.

АҚШ Марказий қўмондонлиги илгари АҚШ ҳарбийлари Ҳормуз бўғози орқали кузатув остида бўлган АҚШ ҳарбий кемалари ва савдо кемаларига Эрон томонидан отилган ракеталар ва дронларни уриб туширганини хабар қилган эди.

Марказий қўмондонлик раҳбари адмирал Брэд Купер ҳам еттита Эрон қайиғи йўқ қилинганини айтди. АҚШ Марказий қўмондонлиги қўшимча тафсилотларни бермади.

Эрон илгари "Озодлик лойиҳаси"ни сулҳни бузиш деб билишини ва бўғозга кираётган АҚШ кемаларига ҳужум қилишини айтган эди. Трамп ўз навбатида, агар эронликлар "Озодлик лойиҳаси"да иштирок этаётган АҚШ кемаларига ҳужум қилсалар, Эрон "ер юзидан ўчириб ташланиши" билан таҳдид қилган эди.

Эрон март ойи бошида Ҳормуз бўғози орқали юк ташишни тўсиб қўйди, бу эса глобал нефть нархларининг кескин кўтарилишининг асосий сабабларидан бири эди. Урушдан олдин глобал нефтнинг 20% ​​гача Ҳормуз бўғози орқали транзит қилинган.